Аб'ядноўваючы намаганні

14 сакавіка 2023

Чыгунка моцная традыцыямі, і адна з найважнейшых – клопат аб працаўніках галіны, якія пайшлі на заслужаны адпачынак. Вынікі гэтай работы за мінулы год і задачы на бягучы абмеркавалі ўдзельнікі пасяджэння Савета ветэранаў Беларускай чыгункі.

Аб выніках даў справаздачу старшыня Савета Сяргей Гогалеў. На 1 студзеня 2023 года на ўліку знаходзілася крыху больш за 31 тыс. неработаючых пенсіянераў. Сярод іх 46 ветэранаў Вялікай Айчыннай вайны (сёння іх, на жаль, ужо 44), 848 ганаровых чыгуначнікаў і 1,8 тыс.тых, хто ўдастоены знакаў «Выдатнік Беларускай чыгункі» і «Выдатны работнік Беларускай чыгункі». Клопат пра іх ажыццяўляюць 172 першасныя і 12 вузлавых ветэранскіх арганізацый.

У прошлым годзе адбылося шмат разнапланавых мерапрыемстваў, прымеркаваных да года гістарычнай памяці і 160-годдзя магістралі. Актыўны ўдзел у іх прынялі і прадстаўнікі старэйшага пакалення працаўнікоў галіны. Сярод найбольш знакавых – сустрэча са старшынёй Пастаяннай камісіі Палаты прадстаўнікоў па прамысловасці, паліўна-энергетычным комплексе, транспарце і сувязі Нацыянальнага сходу Рэспублікі Беларусь Ігарам Камароўскім, цырымонія афіцыйнага гашэння ў Гродне паштовага праекта «Чыгуначныя вакзалы Беларусі», наведванне Цэнтра кіравання перавозкамі і музейнай выставы «Артэфакты Беларускай чыгункі» і, безумоўна, урачысты вечар з нагоды юбілею магістралі, які прайшоў у Нацыянальным акадэмічным Вялікім тэатры оперы і балета 9 снежня.

Акрамя таго, за актыўны ўдзел у грамадска-палітычным, сацыяльна-эканамічным і культурным жыцці, значны асабісты ўклад у развіццё ветэранскага руху і ў сувязі з юбілеем магістралі 114 чалавек былі адзначаны Граматай Арганізацыі ветэранаў БЧ, яшчэ 49 удастоены звання «Ганаровы ветэран», 4 – «Ганаровы старшыня» Беларускага грамадскага аб'яднання ветэранаў.

Важным крокам на шляху ўдасканалення сістэмы інфармавання працаўнікоў магістралі, якія знаходзяцца на заслужаным адпачынку, стала стварэнне на афіцыйным сайце БЧ тэматычнага раздзела «Арганізацыя ветэранаў Беларускай чыгункі». Паступова ён будзе напаўняцца матэрыяламі, прысвечанымі дзейнасці профільных структур, у тым ліку аддзяленчых, вузлавых і першасных.

Нягледзячы на эканамічныя цяжкасці, з якімі сутыкаецца магістраль, у 2023-м для непрацуючых пенсіянераў захаваныя гарантыі адраснай сацыяльнай падтрымкі, прадугледжаныя комплекснай праграмай «Клопат». Адпаведны загад падпісаў начальнік чыгункі Уладзімір Марозаў. Таксама адшукана магчымасць выдзялення бязвыплатнай (спонсарскай) дапамогі, якая паступіць у некалькі этапаў. Ад імя ўсіх ветэранаў галіны Сяргей Гогалеў падзякаваў кіраўніцтву чыгункі за такое чулае і паважлівае стаўленне да старэйшага пакалення. Ён таксама выказаў удзячнасць расійскім калегам з АТ «Аб'яднаная транспартна – лагістычная кампанія – Еўразійскі чыгуначны альянс» (Масква) за дабрачынную фінансавую дапамогу, аказаную восенню мінулага года. Гэтыя сродкі былі накіраваны на падтрымку 480 непрацуючых пенсіянераў, у тым ліку ветэранаў Вялікай Айчыннай, інвалідаў, адзінокіх, малазабяспечаных.

Сяргей Паўлавіч нагадаў, што штогод вясной і восенню праводзіцца маніторынг сацыяльна-бытавых умоў пражывання ветэранаў вайны і працы, абследаванне памятных месцаў, прылеглых да аб'ектаў магістралі. Летам 2022-га на тэрыторыі нашай краіны беларускімі і расійскімі чыгуначнікамі быў рэалізаваны маштабны патрыятычны праект «Цягнік Перамогі». Падапечныя ветэранскіх арганізацый беларускай магістралі актыўна карысталіся магчымасцю наведаць дадзеную экспазіцыю.

Не забываюць ветэраны магістралі і аб фізічнай актыўнасці. Так, у мінулым годзе яны ўжо ў трэці раз прымалі ўдзел у камандных спаборніцтвах міжнароднага фестывалю спорту і здаровага ладу жыцця «Срэбная восень», які арганізуе ААТ «РЖД». Карыстаючыся выпадкам, Сяргей Паўлавіч заклікаў старшыняў ветэранскіх арганізацый на месцах вывучыць захапленні сваіх падапечных і парэкамендаваць для залічэння ў зборную тых, хто займаецца валейболам, настольным тэнісам, шахматамі, лёгкай атлетыкай, плаваннем, дартсам.

У сваім дакладзе старшыня Савета асабліва адзначыў ролю медыцынскіх сясцёр чыгуначнай арганізацыі БЧ Беларускага Чырвонага Крыжа ў аказанні дапамогі ветэранам галіны, якія маюць патрэбу ў клопаце. Падтрымлівае старэйшае пакаленне і моладзь – актывісты галіновага камітэта ГА «БРСМ». Акрамя таго, у якасці валанцёраў усё часцей выступаюць і члены ветэранскіх арганізацый магістралі.

Выступоўца падзякаваў рэдакцыю газеты «Железнодорожник Белоруссии за шырокае і прафесійнае асвятленне дзейнасці ветэранскіх арганізацый і жыцця ветэранаў.

Сяргей Паўлавіч таксама расказаў пра тое, што прысутнічаў на сумесным пасяджэнні Прэзідыума Савета Федэрацыі прафсаюзаў Беларусі, Бюро Цэнтральнага камітэта ГА «БРСМ» і Прэзідыума Рэспубліканскага савета Беларускага грамадскага аб'яднання ветэранаў, якое прайшло ў студзені бягучага года. Сярод найважнейшых задач, прынятых на 2023, – удзел у мерапрыемствах, прысвечаных Году міру і стварэння, патрыятычнае выхаванне маладога пакалення, садзейнічанне ветэранскім арганізацыям у правядзенні святкавання 78-й гадавіны Перамогі савецкага народа ў Вялікай Айчыннай вайне. Таксама дакладчык нагадаў, што дзякуючы зладжанай рабоце саветаў ветэранаў з прафсаюзнымі камітэтамі і пры іх фінансавай падтрымцы ў мінулым годзе вылучаліся білеты на наведванне ветэранамі розных культурна-масавых мерапрыемстваў, выязных экскурсій.

Завяршаючы свой выступ, Сяргей Гогалеў адзначыў, што ў цэлым год быў насычаным падзеямі і прадуктыўным. Ні адзін зварот, які паступіў у арганізацыі ветэранаў магістралі, не застаўся па-за ўвагай. Пісьменна працавалі рэвізійныя камісіі. Залогам паспяховай рэалізацыі задач, пазначаных на бягучы год, старшыня Савета назваў прадуктыўнае супрацоўніцтва ветэранскіх арганізацый з кіраўніцтвам арганізацый і структурных падраздзяленняў галіны, прафсаюзнымі і маладзёжнымі грамадскімі аб'яднаннямі, Чыгуначнай арганізацыі БЧ Беларускага Чырвонага Крыжа.

Далей удзельнікі пасяджэння абмеркавалі некалькі арганізацыйных пытанняў, заслухалі справаздачы ветэранскіх арганізацый аддзяленняў чыгункі. У цэлым работа арганізацыі ветэранаў была прызнана здавальняючай.