Беларуская чыгунка падвяла вынікі акцыі «Дзеці і бяспека»
11 чэрвеня 2018
У сувязі з пачаткам школьных канікул Беларуская чыгунка з 28 мая па 6 чэрвеня правяла акцыю «Дзеці і бяспека».
У рамках прафілактычных мерапрыемстваў работнікамі Ваенізаванай аховы БЧ арганізавана больш за 220 рэйдаў, падчас якіх да адміністрацыйнай адказнасці прыцягнуты 5 чалавек за праход па чыгуначных пуцях у неўсталяваным месцы. Выяўлены і выведзены ў бяспечныя месцы 4 непаўналетніх, якія знаходзіліся на аб'ектах чыгункі без суправаджэння бацькоў ці дарослых. З 11 непаўналетнімі, якія знаходзіліся на чыгуначных пуцях у навушніках і размаўлялі па мабільным тэлефоне, праведзены прафілактычныя гутаркі. З зоны павышанай небяспекі выведзены 13 чалавек, якія знаходзіліся ў стане алкагольнага ап'янення.
Акрамя таго, спецыялістамі беларускай магістралі было праведзена больш за 60 выступленняў у працоўных калектывах і ўстановах адукацыі па пытаннях выканання правілаў бяспекі на чыгуначным транспарце. У іх прынялі ўдзел больш за 2 тысячы чалавек. Пры гэтым асаблівая ўвага была нададзена праблеме знаходжання падлеткаў на чыгуначных пуцях у навушніках і размоваў па сотавых тэлефонах. Менавіта гэтая катэгорыя грамадзян знаходзіцца ў групе рызыкі і выклікае ў спецыялістаў БЧ асаблівую трывогу.
Беларуская чыгунка заклікае грамадзян быць больш уважлівымі на аб'ектах чыгуначнага транспарту і нагадвае аб адміністрацыйнай адказнасці за парушэнне правілаў пераходу чыгуначных пуцей або знаходжанне на іх у неналежным месцы.
Інфармацыя падрыхтавана прэс-цэнтрам БЧ
Да спісу навін за 2018 год