Вынікі сумеснай работы абмеркавалі беларускія і польскія чыгуначнікі

21 лютага 2018

Дэлегацыя Беларускай чыгункі на чале з Начальнікам чыгункі Уладзімірам Марозавым прыняла ўдзел у перамовах з кіраўніцтвам Групы АТ «Польскія дзяржаўныя чыгункі». Мерапрыемства прайшло 15—16 лютага ў Варшаве.

У ходзе сустрэчы бакі разгледзелі вынікі працы па арганізацыі чыгуначных перавозак грузаў і пасажыраў у зносінах Беларусь—Польшча ў 2017 і перспектывы іх развіцця ў 2018 годзе, планы сумесных дзеянняў у перыяд правядзення работ па мадэрнізацыі чыгуначнай інфраструктуры ў Рэспубліцы Польшча ў 2018—2020 гадах, пытанні па актуалізацыі дзеючага Пагаднення паміж Беларускай чыгункай і АТ «Польскія дзяржаўныя чыгункі» аб узаемадзеянні пры арганізацыі міжнародных чыгуначных перавозак і Пагадненняў з таварыствамі Групы АТ «Польскія дзяржаўныя чыгункі» і шэраг іншых пытанняў.

Важнасць тэм, якія абмяркоўваюцца пацвярджалася прадстаўнічым саставам зацікаўленых удзельнікаў з польскага боку. На сустрэчы прысутнічалі кіраўнікі таварыстваў Групы АТ «Польскія дзяржаўныя чыгункі»: АТ «ПКП Польскія чыгуначныя лініі» — кампанія, якая кіруе чыгуначнай інфраструктурай ў Рэспубліцы Польшча, АТ «ПКП Карго» — кампанія грузавога перавозчыка, АТ «ПКП Інтэрсіці», ТАА «ПКП ЛХС» — шырокакалейная металургічная лінія — уладальнік інфраструктуры і перавозчык па каляі 1520.

У рамках перамоваў адзначана важнасць развіцця міжнародных чыгуначных перавозак пасажыраў і грузаў у зносінах Беларусь—Польшча, арганізацыі перавозак грузаў паскоранымі кантэйнернымі цягнікамі ў паведамленні Кітай—Заходняя Еўропа—Кітай, забеспячэння бесперашкоднага пропуску цягнікоў праз беларуска-польскія памежныя пераходы.

У 2017 годзе ў зносінах Усход—Захад—Усход перавезена 12,5 млн тон або 133,0% да 2016 года, у тым ліку з удзелам ПКП «Карго».

Прайшло 3116 кантэйнерных цягнікоў або 158,7% да ўзроўню 2016 года. У саставе кантэйнерных цягнікоў перавезена 306,5 тыс. кантэйнераў у ДФЭ або 161% да ўзроўню 2016 года.

Непасрэдна ў зносінах Кітай—Заходняя Еўропа—Кітай паскоранымі кантэйнернымі цягнікамі перавезена 245,4 тыс. кантэйнераў у ДФЭ або 174,1% да 2016 года.

Улічваючы планаваны рост кантэйнерных перавозак у кірунку Усход—Захад—Усход з мэтай развіцця інфраструктуры і павелічэння перапрацоўчай здольнасці станцый на беларуска-польскіх памежных пераходах, Беларуская чыгунка рэалізуе шэраг праектаў, сярод якіх інвестыцыйны праект па мадэрнізацыі станцыі Брэст-Паўночны. Гэта дасць магчымасць павысіць сярэднясутачную перапрацоўчую здольнасць станцыі па перапрацоўцы кантэйнераў, скараціць час на іх апрацоўку і паскорыць пропуск. Завяршыць усе работы плануецца ў 2018—2019 гг. Аб'ём інвестыцый складзе каля 8 мільёнаў долараў ЗША.

Таксама развіваецца інфраструктура станцый Брузгі (памежны пераход Брузгі—Кузніца Беластоцкая) і Свіслач (памежны пераход Свіслач—Семянуўка). Дадзеная праца накіравана на павышэнне перапрацоўчай здольнасці грузавых тэрміналаў для апрацоўкі і пропуску ўзрастаючых грузапатокаў у напрамку Захад—Усход, Усход—Захад. Плануемы аб'ём інвестыцый складзе каля 10 мільёнаў долараў ЗША.

Беларуская чыгунка працуе на перспектыву, забяспечвае існуючыя грузапатокі і мае патэнцыял для павелічэння аб'ёмаў перадачы грузаў праз беларуска-польскія памежныя пераходы. У цяперашні час прапрацоўваюцца пытанні, звязаныя з аднаўленнем чыгуначных зносін па каляі 1435 мм праз памежны пераход Высока-Літоўск—Чаромха.

На сустрэчы бакі выказалі зацікаўленасць у далейшым развіцці міжнародных чыгуначных пасажырскіх зносін і дамовіліся працягнуць развіццё перасадачных пасажырскіх зносін Варшава—Брэст—Мінск, а таксама па іншых напрамках паміж Беларуссю і Польшчай. З пачатку арганізацыі перасадачных зносін Варшава—Брэст—Мінск з 10.12.2017 перавезена больш за 16 тыс. пасажыраў.

Інфармацыя падрыхтавана прэс-цэнтрам БЧ