Беларуская чыгунка завяршае падрыхтоўку станцыі Полацк да Дня беларускага пісьменства

14 жніўня 2017

Зараз на станцыі завяршаюцца рамонтныя работы. Гасцей нацыянальнага свята, якія прыбудуць у Полацк па чыгунцы, сустрэнуць адрамантаваныя будынкі вакзала, білетных кас і багажнага аддзялення. Таксама на прывакзальнай плошчы і платформах зроблены рамонт пліткавага пакрыцця, малых архітэктурных формаў, стоек асвятлення i агароджаў, у тым ліку на пешаходным мосце. У цэлым на падрыхтоўку будынкаў, збудаванняў і інфраструктуры полацкага чыгуначнага вузла да Дня беларускага пісьменства накіравана 365 тысяч рублёў.

2—3 верасня ў рамках Дня беларускага пісьменства адсвяткуюць 500-годдзе беларускага кнігадрукавання і 1155-годдзе Полацка — самага старажытнага горада Беларусі. Нагадаем, у 2017 годзе Беларускай чыгунцы спаўняецца 155 гадоў. Таксама ў гэтым годзе 65 гадоў спаўняецца сучаснаму будынку вакзала станцыі Полацк. Выбудаванае нанава пасля Вялікай Айчыннай вайны, яно было здадзена ў эксплуатацыю ў 1952 годзе.

За першае паўгоддзе 2017 года з вакзала станцыі Полацк адпраўлена 305 тысяч пасажыраў, у тым ліку цягнікамі міжрэгіянальных ліній — 42 800 чалавек — гэта на 25% больш, чым за аналагічны перыяд мінулага года. Значны прырост у міжрэгіянальным паведамленні стаў магчымы дзякуючы новаму цягніку бізнес-класа ДП3, які з 11 снежня 2016 года штодня курсуе паміж Полацкім і Магілёвам.

З 25 ліпеня на вакзале станцыі Полацк пасажыры маюць магчымасць бясплатнага доступу ў Інтэрнэт па тэхналогіі Wi-Fi. Доступ у сетку ажыцяўляецца з выкарыстаннем тэхналогіі 4G і аптычных сетак сувязі.

У цяперашні час праз станцыю Полацк курсуюць цягнікі міжнародных ліній Полацк—Масква, Калінінград—Санкт-Пецярбург, Мінск—Рыга, а таксама цягнікі міжрэгіянальных ліній Полацк—Магілёў, Полацк—Гомель, Мінск—Полацк, а таксама Віцебск—Мінск.

Інфармацыя падрыхтавана прэс-цэнтрам БЧ