Канструктарска-тэхнічны цэнтр

Кантактная інфармацыя:

Тэл. (+375 17) 225 40 98, факс  225 29 30
E-mail: ktc@mnsk.rw.by
Адрас: Рэспубліка Беларусь, г. Мінск, вул. Брэст-Літоўская, 9а
Юрыдычны адрас: Рэспубліка Беларусь, 220038 г. Мінск, зав. 1-ы Цвёрды, 6

• Распрацоўка, праектаванне і будаўніцтва пад ключ сістэм і комплексаў АСУТП;

• Укараненне новых тэхналогій і тэхнічных сродкаў па аўтаматызацыі тэхналагічных працэсаў на чыгуначным транспарце. Арганізацыя і выкананне работ па абслугоўванню апаратных сродкаў і суправаджэнню праграмнага забеспячэння сістэм і комплексаў АСУТП. Аўтаматызаванае праектаванне з выкарыстаннем метадаў трохмернага мадэлявання;

• Выпрабаванні і тэхнічны аўдыт прадукцыі чыгуначнага прызначэння. Арганізацыя выпрабаванняў з выкарыстаннем інфраструктуры Беларускай чыгункі. Выпрабаванні праграмнага забеспячэння сістэм і комплексаў АСУТП. Неразбураючы кантроль вузлоў і дэталяў рухомага саставу;

• Метралагічнае забеспячэнне вытворчай дзейнасці чыгуначнага транспарту. Паверка і рамонт сродкаў вымярэнняў, у тым ліку складаных радыёэлектронных прылад і сістэм, прыбораў уліку і рэгулявання цеплавой энергіі. Атэстацыя выпрабавальнага абсталявання.

Інавацыйная палітыка Беларускай чыгункі дазваляе паспяхова ўкараняць і развіваць перадавыя метады работы ў розных галінах гаспадарчай дзейнасці. Важным складнікам эфектыўнасці працы чыгуначнікаў з'яўляецца паўнавартаснае інфармацыйнае забеспячэнне. У гэтых мэтах на чыгунцы функцыянуе з 1986 года Канструктарска-тэхнічны цэнтр Беларускай чыгункі, у склад якога ўваходзяць падраздзяленні:

• Праектна-тэхналагічнае бюро (г. Мінск);
• Бюро выпрабаванняў і тэхнічнага аўдыту (г. Мінск, г. Віцебск);
• Гомельскі цэнтр АСУ (г. Гомель);
• Цэнтральная лабараторыя метралогіі (г. Мінск);
• Бюро радыёэлектронных сістэм (г. Мінск);
• Чыгуначная электратэхнічная лабараторыя (г. Мінск);
• Чыгуначная лабараторыя аўтаматыкі і тэлемеханiкi (г. Мінск);
• Чыгуначная лабараторыя сеткі сувязі і перадачы даных (г. Мінск);
• Чыгуначны лабараторыя вагоннай гаспадаркі (г. Мінск).

Прыярытэтнымі напрамкамі дзейнасці Канструктарска-тэхнічнага цэнтра Беларускай чыгункі з'яўляюцца распрацоўка, праектаванне, выраб і засваенне аўтаматызаваных сістэм кіравання тэхналагічнымі працэсамі на аснове сучасных інфармацыйных тэхналогій.

Распрацаваная ў Канструктарска-тэхнічным цэнтры тэхналогія збору, апрацоўкі і перадачы інфармацыі дазваляе аўтаматызаваць працэс кантролю і кіравання аб'ектамі ў розных галінах народнай гаспадаркі. Універсальнасць распрацаванай тэхналогіі дазволіла вырашаць пытанні комплекснага інфармацыйнага абслугоўвання розных тэхналагічных участкаў чыгункi.

Адным з варыянтаў паспяховага прымянення дадзенай тэхналогіі на Беларускай чыгунцы з'яўляецца засваенне аўтаматызаванай мікрапрацэсарнай сістэмы дыспетчарскай цэнтралізацыі "НЁМАН" (АС ДЦ "НЁМАН"),якая прызначана для дыстанцыйнага кантролю і кіравання.

У цяперашні час дадзеная тэхналогія выкарыстоўваецца для:

• энергазабеспячэння і жыццезабеспячэння будынкаў і збудаванняў;
• сігналізацыі, цэнтралізацыі, блакіроўкі і сувязі на чыгуначным транспарце;
• планавання, арганізацыі і кіравання рухам на чыгуначным транспарце.

АС ДЦ "НЁМАН" забяспечвае дыстанцыйны кантроль, выяўленне адхіленняў ад нормы ў тэхналогіях перавозачнага працэсу ад нормы, кантроль стану апаратуры з вядзеннем пратаколу тэлесiгналiзацыi, дзеянняў персаналу, які абслугоўвае аб'екты энергазабеспячэння і жыццезабеспячэння будынкаў і збудаванняў, сігналізацыі, цэнтралізацыі, блакіроўкі і сувязі на чыгуначным транспарце.

Засваенне праграмна-апаратнага комплексу дыспетчарскай цэнтралізацыі "НЁМАН" дазволіла істотна скараціць выдаткі на абсталяванне працоўных месцаў дыспетчараў розных тэхналагічных участкаў (дыспетчараў цягнікоў, энергадыспетчараў, дыспетчараў сувязі) і забяспечыць іх найбольш поўнай інфармацыяй аб аператыўнай сітуацыі з цягнікамі, стане прыладаў СЦБ, сувязі і энергазабеспячэння. Пры распрацоўцы АРМ дыспетчара цягнікоў рэалізаваны такія функцыі, як вядзенне выкананага графіка руху цягнікоў, тэлевымярэнне электрычных параметраў кантраляваных аб'ектаў, аўтаматызацыя разлікаў паказчыкаў працы дыспетчараў. На базе дадзенай тэхналогіі Беларуская чыгунка змагла выйсці на новы ўзровень арганізацыі аператыўнага кіравання і стварыць Цэнтр кіравання перавозкамі (ЦКП).

Кошт засваення АС ДЦ "Нёман" значна ніжэй кошту засваення аналагічных замежных сістэм і на сёння праграмна-апаратны комплекс дыспетчарскай цэнтралізацыі "НЁМАН" паспяхова функцыянуе на чыгунках Беларусі, Эстоніі і Казахстана.

Паспяховы вопыт распрацоўкі ДЦ «Нёман», якая дазваляе кіраваць рухам цягнікоў на ўчастку, пасля быў ужыты пры распрацоўцы мікрапрацэсарнай цэнтралізацыі стрэлак і сігналаў «Днепр», якая прызначана для цэнтралізаванага кіравання прыладамі СЦБ на станцыі з забеспячэннем бяспекі руху цягнікоў. У цяперашні час МПЦ «Днепр» укаранёна не толькі на шэрагу станцый Беларускай чыгункі, але і за яе межамі.

Выкарыстоўванне мікрапрацэсарнай тэхнікі дазволіла істотна пашырыць функцыянальныя магчымасці сістэмы дыспетчарскай цэнтралізацыі. Акрамя аператыўнага адлюстравання сітуацыі з цягнікамі, стану аб'ектаў кантролю, сучасная сістэма ДЦ "Нёман" дапоўнена функцыямі аўтаматычнага разліку паказчыкаў работы, прагназавання, планавання, дакументавання падзей, вядзення архіваў дакументаў і нарматыўна-даведачнай інфармацыі, комплекснай дыягностыкі тэхнічных сродкаў і стану праграмнага забеспячэння, тэлевымярэння, абмену з сістэмамі АСАКП, САIРС і інш.

Засваенне Сістэмы аўтаматычнай ідэнтыфікацыі рухомага саставу (САIРС) на Беларускай чыгунцы карэнным чынам змяняе тэхналогію збору звестак аб перамяшчэннях і месцазнаходжаннi вагонаў і лакаматываў, дазваляе ставіць і вырашаць маштабныя задачы аптымізацыі кіравання перавозачным працэсам. Увесь лакаматыўны і вялікая частка грузавога вагоннага парку беларускай магістралі абсталяваны кодавымі бартавымі датчыкамі, на пуцях устаноўлены спецыяльныя наземныя пункты счытвання, якія ў аўтаматычным рэжыме апрацоўваюць звесткі (састаўнасць цягніка, час і кірунак руху, нумар лакаматыва і вагона). САIРС дазваляе не толькі весці ўлік лакаматываў і вагонаў, але і павялічыць колькасць кантраляваных кропак тэхналагічнага працэсу.

У рамках работ па павышэнню эфектыўнасці выкарыстання энергетычных рэсурсаў Гомельскім цэнтрам распрацавана Рэгіянальная сістэма інтэграванай апрацоўкі маршруту машыніста (РС IАММ), якая дазволіла пашырыць магчымасці эксплуатаванай сістэмы інтэграванай апрацоўкі маршруту машыніста (IАММ) IВЦ Куйбышаўскай чыгункі (г. Самара) за кошт распрацоўкі ўласных справаздачных формаў. Засваенне дадзенага апраграмавання дало магчымасць комплексна вырашаць пытанні атрымання справаздачнай дакументацыі па аб'ёмах работ, выконваемых машыністамі, больш поўнага ўліку і дакладнага нармавання расходу энерганосьбітаў.

Сістэма аўтаматызацыі падрыхтоўкі і афармлення дакументацыі грузавой камерцыйнай справаздачнасці (САПАД) засвойваецца не толькі на прадпрыемствах Беларускай чыгункі, але і на прадпрыемствах Узбекскіх чыгунак. У дадзенай распрацоўцы ўпершыню рэалізавана магчымасць стварэння поўнага варыянту электроннай чыгуначнай ведамасці. Акрамя таго, яна дазваляе ажыццяўляць як унутраны, так і міждзяржаўны дакументаабарот ў электронным выглядзе.

Рэалізаваная Аўтаматызаваная сістэма кантролю бяспекі руху (АС КБР) істотна палепшыла працу Апарата галоўнага рэвізора па бяспецы руху цягнікоў па зборы і апрацоўцы інфармацыі, а таксама аператыўнага рэагавання на выпадкі браку, дапушчаныя ў працэсе перавозак.

Магчымасці Канструктарска-тэхнічнага цэнтра дазваляюць праводзiць і іншыя работы, такія як метралагічнае забеспячэнне; распрацоўка нарматыўна-тэхнічнай, канструктарскай і метадычнай дакументацыі; складанне кніг раскладу пасажырскага, прыгараднага і грузавога руху; мантаж і наладка прыбораў уліку вады і цяпла, пусканаладачныя работы электратэхнічных прылад; ліццё і механічная апрацоўка дэталяў з каляровых і чорных металаў, і сплаваў на іх аснове.

У мэтах павышэння бяспекі і якасці перавозачнага працэсу, Цэнтральная лабараторыя метралогіі ўдзельнічае ў распрацоўцы і засваенню сучасных методык правядзення вымярэнняў, паверкі або каліброўкі сродкаў вымярэнняў і допускавага кантролю, аўтаматызаванага кантрольна-вымяральнага абсталявання, вымяральных сістэм, эталонаў, якія прымяняюцца для паверкі (каліброўкі) сродкаў вымярэнняў, атэстацыі (каліброўкі) выпрабавальнага абсталявання на прадпрыемствах Беларускай чыгункі і ў іншых арганізацыях.

Важным з'яўляецца ўдзел у забеспячэнні адзінства і патрабаванай дакладнасці вымярэнняў для арганізацыі бяспечнага руху саставаў Беларускай чыгункі, дасягненні высокай якасці выпускаемай прадукцыі, паслуг, рамонту, абслугоўвання тэхнічных сродкаў, стварэнне бяспечных умоў працы і аховы навакольнага асяроддзя.

Цэнтральная лабараторыя метралогіі акрэдытавана на правядзенне такіх работ як: паверка сродкаў вымярэнняў і допускавага кантролю, атэстацыя выпрабавальнага абсталявання; каліброўка сродкаў вымярэнняў, сродкаў допускавага кантролю і выпрабавальнага абсталявання; аэрадынамічныя выпрабаванні сістэм вентыляцыі і кандыцыянавання паветра, сістэм супрацьдымнай абароны будынкаў і збудаванняў на санітарна-гігіенічныя патрабаванні да паветранага асяроддзя, сертыфікацыйных выпрабаванняў грузавых і пасажырскіх вагонаў. Маецца сертыфікат адпаведнасці на рамонт сродкаў вымярэнняў. Кваліфікаванымі спецыялістамі выконваюцца работы ў стацыянарных умовах, у перасоўных вагонах-лабараторыях, а таксама непасрэдна на прадпрыемствах у заказчыкаў.

Спецыялісты чыгуначнай лабараторыі энергаэфектыўных тэхналогій і абсталявання праводзяць аналіз энергаспажывання арганізацыямі чыгункі, рэкамендуюць прымяненне найноўшых дасягненняў навукова-тэхнічнага прагрэсу ў галіне энергазберажэння, распрацоўваюць нормы расходу паліўна-энергетычных рэсурсаў для арганізацый Беларускай чыгункі.

У мэтах пашырэння сферы сваёй дзейнасці ў галіне энерга- і рэсурсазберагальных тэхналогій, лабараторыя праводзіць падрыхтоўчыя работы па акрэдытацыі ў Нацыянальнай сістэме пацвярджэння адпаведнасці Рэспублікі Беларусь на права правядзення энергетычных аўдытаў.

Чыгуначная лабараторыя аўтаматыкі і тэлемеханiкi засвойвае новыя прылады і сістэмы чыгуначнай сігналізацыі, цэнтралізацыі і блакіроўкі (СЦБ), сувязі, дыстанцыйна-інфармацыйных сістэм кантролю (КТСМ), сістэмы аўтаматычнай ідэнтыфікацыі рухомага саставу (САIРС), прамысловага тэлебачання і пасажырскай аўтаматыкі. Акрамя гэтага, вядзецца распрацоўка і правядзенне мерапрыемстваў, скіраваных на павышэнне надзейнасці функцыянавання сістэм і прылад чыгуначнай аўтаматыкі, тэлемеханiкi і сувязі, выкананне вымярэнняў параметраў кабельных і валаконна-аптычных ліній сувязі, выпрабаванняў лічбавых каналаў і трактаў, выпрабаванняў чыгуначнай прадукцыі па параметрах электрамагнітнай сумяшчальнасці (ЭМС) пры ўваходным кантролі, прыёма-здатачных, сертыфікацыйных і іншых выпрабаваннях. Праводзіцца перыядычны кантроль параметраў аўтаматычнай лакаматыўнай сігналізацыі (АЛСН), лакаматыўнай радыёсувязі (ПРС) і працы апаратуры КТСМ, ДІСК для забеспячэння бяспекі руху цягнікоў.

Чыгуначная лабараторыя аўтаматыкі і тэлемеханiкi акрэдытаваная ў Сістэме акрэдытацыі Рэспублікі Беларусь на адпаведнасць патрабаванням СТБ ІСО/МЭК 17025 для ажыццяўлення сваіх функцый у наступных галінах:

• вымярэнне параметраў валаконна-аптычных ліній;
• вымярэнне электрычных параметраў кабельных ліній сувязі;
• выпрабаванне лічбавых каналаў і трактаў;
• вымярэнне параметраў цягніковай радыёсувязі;
• выпрабаванне чыгуначнага рухомага саставу на электрамагнітную сумяшчальнасць.

Для павышэння якасці і паўнаты выконваемых работ Чыгуначная лабараторыя аўтаматыкі і тэлемеханiкi праводзіць работы па далейшым пашырэнні вобласці сваёй акрэдытацыі (пашырэнне магчымасцяў па вымярэннях параметраў валаконна-аптычных ліній і выпрабаваннях на ЭМС, засваенне выпрабаванняў сістэм і прыладаў СЦБ на адпаведнасць эксплуатацыйна-тэхнічным патрабаванням).

Чыгуначная лабараторыя сеткі сувязі і перадачы звестак (ЧЛ ССПЗ) забяспечвае аператыўна-тэхнічнае кіраванне лічбавай сеткай сувязі і адзінай сеткай перадачы звестак Беларускай чыгункі.

У Канструктарска-тэхнічным цэнтры створаны Выпрабавальны цэнтр аб'ектаў чыгуначнага транспарту, задачамі якога з'яўляюцца:

• правядзенне сертыфікацыйных, прыёмачных і іншых відаў выпрабаванняў прадукцыі чыгуначнага прызначэння патрабаванням нормаў бяспекі;
• правядзенне вымярэнняў (выпрабаванняў) у рамках уваходнага кантролю.

Выпрабавальны цэнтр акрэдытаваны:

• на правядзенне сертыфікацыйных выпрабаванняў грузавых і пасажырскіх вагонаў;
• на вызначэнне хімічнага складу, цвёрдасці і мiкраструктуры металаў і сплаваў.

Цэнтр праводзіць працы па пашырэнні вобласці акрэдытацыі на выпрабаванні апаратуры аўтаматыкі, тэлемеханiкi, сувязі і элементаў верхняй часткi пуцi, паспяхова праведзены выпрабаванні чатырох мадэляў вагонаў: 61-4179.М, 61-537.1, 61-779А і Лаб-2.001.563.

Дырэкцыяй савета па чыгуначным транспарце дзяржаў-удзельніц садружнасці прынята рашэнне аб унясенні Выпрабавальнага цэнтра ў «Рэестр прызнаных Саветам па чыгуначным транспарце дзяржаў-удзельніц Садружнасці арганізацый, акрэдытаваных ва ўстаноўленым парадку на права правядзення работ па ацэнцы адпаведнасці чыгуначнай прадукцыі».

Канструктарска-тэхнічны цэнтр мае сертыфікат адпаведнасці патрабаванням СТБ ISO 9001-2009 на сістэму менеджменту якасці ў галіне праектных і канструктарскіх работ у будаўніцтве, машынабудаванні, праектаванні электронных прылад і праграмнага забеспячэння, прылад сістэм электразабеспячэння, ўстаноўкі прыбораў уліку вады і цяпла.