Удачны старт

22 верасня 2021

З перамогі пачала выступленне ў новым сезоне каманда БЧ.

У 1-м туры GRANDSPORT-прэм'ер-лігі па футзале чыгуначнікі на хатняй пляцоўцы ў Гомелі прымалі сталічную "Ахову-Дынама".

Стартавы матч заўсёды хвалюючы. А для каманды, якая заваявала ўзнагароды папярэдняга першынства і якая ў міжсезонне сур'ёзна абнавіла склад – - удвая. Аб вялікай адказнасці перад балельшчыкамі казаў і галоўны трэнер чыгуначнікаў Дзмітрый Некрашэвіч. Утрымаць высока паднятую планку няпроста, але прафесіяналам, якія сабраліся ў камандзе БЧ, гэта цалкам па сілах. Што мінулы матч яшчэ раз пацвердзіў. Навічкі нядрэнна сябе праявілі, здолеўшы не проста паказаць прыстойны ўзровень, але і адкрыць лік забітым за нашу дружыну мячам. Але галоўнае-здолелі знайсці агульную мову з больш дасведчанымі партнёрамі па камандзе. А гэта напэўна заклад будучых перамог.

...Ужо на 2-й хвіліне чыгуначнікі адкрылі лік. Прастрэл уздоўж лініі варот – і мяч пасля ўдару Андрэя Чарніенка апынуўся ў сетцы. Мінчане аднавілі раўнавагу на 11-й, вызначыўся Яўген Чыжык. Праз дзве хвіліны гаспадары пляцоўкі выйшлі наперад. Іван Ноўскі адпасаваў Аляксандру Нехаю, а той акуратна прыняў пяткай мяч і адправіў яго ў сетку. Не гол, а маленькі шэдэўр!

У другім тайме чыгуначнікі нарасцілі перавагу. Любая атака, любы стандарт у іх выкананні таілі небяспеку для "Аховы-Дынама". На 29-й хвіліне каманда БЧ забіла трэці гол-віншаванні прымаў Алег Носаль. Праз дзве хвіліны-чацвёрты, аўтарам якога стаў Георгій Цікурышвілі. Мінчане неўзабаве адказалі сваім забітым мячом, прычым зноў вызначыўся Яўген Чыжык. Апошняе слова сказалі гаспадары пляцоўкі. Пяты мяч правёў у вароты суперніка адзін з самых вопытных спартсменаў у камандзе БЧ Сяргей Сілівончык. Яго ўдар на 36-й хвіліне-разважлівы і магутны-завяршыў розыгрыш вуглавога. У выніку з лікам 5:2 перамаглі чыгуначнікі. Лепшым у складзе нашай каманды быў прызнаны галкіпер Ягор Чыпуліс.

Вось як пракаменціраваў вынікі матчу галоўны трэнер чыгуначнікаў Дзмітрый Некрашэвіч:

- У першую чаргу, хацеў бы павіншаваць усіх балельшчыкаў, гульцоў і трэнераў з пачаткам чэмпіянату краіны. Што тычыцца матчу, для нашай каманды ён атрымаўся неадназначным па змесце. Гэта і не дзіўна-склад абнавіўся працэнтаў на 70, хлопцы прыціраюцца адзін да аднаго, наладжваюць ўзаемадзеянні. Мы яшчэ шукаем спалучэння ў чацвёрках, з мінчанамі, напрыклад, згулялі ў тры, далі ўсім праявіць сябе. З улікам гэтага стараліся падтрымліваць высокі тэмп гульні.

У першым тайме было шмат бязладдзя, прайграных адзінаборстваў. Часам няўзгоднена гулялі ў абароне, што прывяло да прапушчанага мяча. Добра, што атрымалася ў далейшым выйсці наперад. Пасля перапынку зайгралі больш упэўнена, агрэсіўна, стараліся нагнятаць абстаноўку каля варот суперніка. Стартавы паядынак паказаў, што нам трэба будзе прарабіць яшчэ шмат работы, дадаваць ва ўсіх аспектах. Я ўдзячны спартсменам за перамогу, а балельшчыкам, якія прыйшлі на матч, - за падтрымку.

Наступны матч наша дружына правядзе з "Дарожнікам".