Беларуская чыгунка прымае аператыўныя меры па ліквідацыі наступстваў снегападаў
30 лістапада 2022
Моцныя снегапады на тэрыторыі Рэспублікі Беларусь у мінулыя выхадныя прывялі да падзення дрэў на аб'екты чыгуначнай інфраструктуры, што стала прычынай адключэння ліній электразабеспячэння на асобных участках Беларускай чыгункі.
Стыхія ў асноўным закранула Магілёўскі рэгіён. Усяго зафіксавана падзенне больш за 1300 дрэў. Агульная працягласць участкаў, на якіх былі адзначаны збоі ў электразабеспячэнні і работы сродкаў сігналізацыі і сувязі, склала 210 км.
Пацярпелых і пашкоджанняў рухомага саставу не зафіксавана.
Разам з тым, у перыяд 27-28 лістапада 2022 года на ўчастках Магілёў–Крычаў, Крычаў–Бялынкавічы, Крычаў–Орша 49 пасажырскіх цягнікоў рухаліся з адхіленнем ад устаноўленага графіка руху. Затрымка складала ад 7 хвілін да 2 гадзін 54 хвілін.
29 лістапада 2022 года таксама назіраюцца нязначныя затрымкі ў графіку руху цягнікоў на гэтых участках (да 10 хвілін).
Беларускай чыгункай аператыўна прымаюцца неабходныя меры па ліквідацыі наступстваў непагоды. У цяперашні час працягваюцца аварыйна-аднаўленчыя работы, да якіх прыцягнуты больш за 130 работнікаў беларускай магістралі, задзейнічана 25 адзінак спецыяльнай тэхнікі.
Беларуская чыгунка прыносіць прабачэнні пасажырам за прычыненыя нязручнасці і просіць з разуменнем аднесціся да сітуацыі, якая склалася.
Інфармацыя падрыхтавана прэс-цэнтрам БЧ