16-17 лістапада 2023 года Беларуская чыгунка праводзіць I Злёт навучэнцаў транспартных класаў чыгуначнай накіраванасці ўстаноў агульнай сярэдняй адукацыі

17 лістапада 2023

Урачыстае адкрыццё форуму адбылося 16 лістапада 2023 года ў Мінскім Палацы культуры і спорту чыгуначнікаў.

У мерапрыемстве прынялі ўдзел больш за 120 навучэнцаў транспартных і профільных класаў чыгуначнай накіраванасці з 14 школ Мінска, Оршы, Баранавічаў, Ліды, Лунінца, Брэста, Гомеля, Жлобіна, Калінкавічаў, Светлагорска, Магілёва і Віцебска, а таксама выхаванцы Дзіцячай чыгункі імя К. С. Заслонава, навучэнцы каледжаў – філіялаў Беларускага дзяржаўнага ўніверсітэта транспарту і Мінскага дзяржаўнага каледжа чыгуначнага транспарту імя Я. П. Юшкевіча, кіраўніцтва, ветэраны і моладзь Беларускай чыгункі, а таксама старшыня камітэта па адукацыі Мінскага гарадскога выканаўчага камітэта Андрэй Стрыгельскі.

Адкрыў злёт Начальнік Беларускай чыгункі Уладзімір Марозаў. У сваім выступленні ён адзначыў, што беларуская магістраль аб'ядноўвае больш за 60 тысяч работнікаў – прадстаўнікоў больш за 300 розных прафесій і спецыяльнасцей, што дае магчымасць сённяшнім школьнікам з улікам сваіх здольнасцей і жадання зрабіць усвядомлены выбар будучай прафесіі. І не выпадкова дэвіз злёту – «Разам па дарозе магчымасцяў!».

Уладзімір Міхайлавіч выказаў упэўненасць, што злёт дазволіць навучэнцам транспартных і профільных класаў лепш спазнаць Беларускую чыгунку, акунуцца ў атмасферу вытворчага і культурнага жыцця чыгуначнікаў, а таксама знайсці новых сяброў.

Таксама свае словы будучым чыгуначнікам у відэазваротах адрасавалі Міністр транспарту і камунікацый Рэспублікі Беларусь Аляксей Ляхновіч і намеснік Міністра адукацыі Рэспублікі Беларусь Аляксандр Кадлубай.

Урачыстая цырымонія адкрыцця завяршылася канцэртнай праграмай, падрыхтаванай артыстамі Культурна-спартыўнага цэнтра Мінскага аддзялення Беларускай чыгункі і сімвалічным ударам у чыгуначны звон, якім быў дадзены старт I злёту навучэнцаў транспартных класаў чыгуначнай накіраванасці ўстаноў агульнай сярэдняй адукацыі.

У першы дзень злёту яго ўдзельнікі наведалі Цэнтр кіравання перавозкамі Беларускай чыгункі і навучальны цэнтр Дзіцячай чыгункі імя К.С. Заслонава, пазнаёміліся са славутасцямі горада Мінска, пабывалі ў Нацыянальнай бібліятэцы Беларусі, а пасля гэтага на электрацягніку рэгіянальных ліній бізнес-класа адправіліся ў горад Баранавічы.

17 лістапада 2023 года для ўдзельнікаў злёту будзе арганізавана экскурсія ў Музей чыгункі ў горадзе Баранавічы, дзе яны дакрануцца да багатай і слаўнай гісторыі беларускай магістралі. Таксама ў праграме мерапрыемства прадугледжана азнаямленне з работай аднаго з найбуйнейшых прадпрыемстваў Беларускай чыгункі – лакаматыўнага дэпо Баранавічы, дзе ў цяперашні час арганізаваны абслугоўванне і рамонт сучасных грузавых электравозаў БКГ1 і БКГ2. Завершыцца злёт правядзеннем дыялогавай пляцоўкі і спартыўна-інтэлектуальнымі гульнямі.

Першы транспартны клас у Беларусі адкрыўся ў верасні 2012 года ў горадзе Магілёве. У цяперашні час у нашай краіне функцыянуюць 19 транспартных і профільных класаў, у якіх праходзяць навучанне больш за 350 юнакоў і дзяўчат.

Школьнікі транспартных і профільных класаў знаёмяцца з асаблівасцямі прафесіі чыгуначніка. У праграме навучання прадугледжаны вытворчыя экскурсіі, семінары, канферэнцыі, выязныя заняткі з наведваннем аб'ектаў чыгуначнага транспарту, удзел у прафесійных конкурсах і т.д.

Дзеці, якія паспяхова скончылі транспартныя класы, змогуць атрымаць мэтавае накіраванне для паступлення ва ўстановы адукацыі, якія рыхтуюць спецыялістаў для работы на Беларускай чыгунцы.

Беларускай чыгункай пры падтрымцы Міністэрства адукацыі Рэспублікі Беларусь для транспартных класаў распрацаваны праграмы аб'яднання па інтарэсах «На шляху да прафесіі: асновы чыгуначнага транспарту «для навучэнцаў 8-9 класаў і факультатыўных заняткаў» «Уводзіны ў прафесіі чыгуначнага транспарту» для навучэнцаў 10-11 класаў.

Праграмы арыентаваны на дадатковую прафарыентацыйную падрыхтоўку школьнікаў для атрымання ў далейшым адукацыі па спецыяльнасцях чыгуначнай накіраванасці.

У рэалізацыі і метадычным суправаджэнні гэтых праграм прымаюць удзел арганізацыі Беларускай чыгункі, Дарожны цэнтр па падрыхтоўцы, перападрыхтоўцы і павышэнні кваліфікацыі кадраў дзяржаўнага аб'яднання «Беларуская чыгунка» і вядучыя профільныя ўстановы адукацыі: Беларускі дзяржаўны ўніверсітэт транспарту і яго філіялы: Брэсцкі, Аршанскі і Гомельскі каледжы, а таксама Мінскі дзяржаўны каледж чыгуначнага транспарту імя Я.П. Юшкевіча.

Інфармацыя падрыхтавана прэс-цэнтрам БЧ