16-17 лістапада 2023 года Беларуская чыгунка ўпершыню правядзе злёт навучэнцаў транспартных класаў чыгуначнай накіраванасці ўстаноў агульнай сярэдняй адукацыі

11 лістапада 2023

Ён арганізаваны ў мэтах папулярызацыі чыгуначных прафесій і прафесійнай арыентацыі моладзі. Дэвіз злёту «Разам па дарозе магчымасцяў!»

У мерапрыемстве прымуць удзел больш за 120 навучэнцаў транспартных і профільных класаў чыгуначнай накіраванасці з 14 школ Мінска, Оршы, Баранавічаў, Ліды, Лунінца, Брэста, Гомеля, Жлобіна, Калінкавічаў, Светлагорска, Магілёва і Віцебска, а таксама выхаванцы Дзіцячай чыгункі імя К.С. Заслонава, навучэнцы каледжаў – філіялаў Беларускага дзяржаўнага ўніверсітэта транспарту і Мінскага дзяржаўнага каледжа чыгуначнага транспарту імя Я. П. Юшкевіча.

Удзельнікаў злёту чакае насычаная і пазнавальная двухдзённая праграма ў Мінску і Баранавічах, падчас якой дзеці наведаюць вытворчыя і культурныя аб'екты Беларускай чыгункі, пазнаёмяцца са славутасцямі сталіцы Беларусі, а таксама прадэманструюць свае інтэлектуальныя і спартыўныя магчымасці.

Першы транспартны клас у Беларусі адкрыўся ў верасні 2012 года ў горадзе Магілёве. У цяперашні час у нашай краіне функцыянуюць 19 транспартных і профільных класаў, у якіх праходзяць навучанне больш за 350 юнакоў і дзяўчат.

Інфармацыя падрыхтавана прэс-цэнтрам БЧ