На Беларускай чыгунцы падведзены вынікі маладзёжнага конкурсу сацыяльнай антыкарупцыйнай рэкламы «Разам супраць карупцыі!»

15 верасня 2023

Конкурс праводзіўся сярод работнікаў БЧ ва ўзросце да 35 гадоў. Свае ідэі яны маглі аформіць у выглядзе плаката і (або) відэароліка. Яго галоўная мэта – прыцягненне моладзі беларускай магістралі да ўдзелу ў прафілактыцы карупцыі, фарміраванне ў грамадстве нецярпімых адносін да падобных супрацьзаконных праяў.

Усяго на разгляд журы было прадстаўлена 8 відэаролікаў і 39 плакатаў, выкананых у розных мастацкіх тэхніках.

У намінацыі «Лепшы відэаролік» першае месца заняла работа электрамеханіка Гомельскай дыстанцыі сігналізацыі і сувязі Арцёма Базарава. На дадзены конкурс чыгуначнік даслаў два відэаролікі, другі – створаны ў тандэме з мастацкім кіраўніком клубнай установы Культурна-спартыўнага комплексу Гомельскага аддзялення Валерыяй Бялецкай – заняў трэцяе месца ў гэтай жа намінацыі. Другое месца прысуджана рабоце машыніста крана аднаўленчага цягніка Брэсцкага аддзялення Дзмітрыю Чэлідзэ.

Аўтарам лепшага плаката на дадзеную тэму стала інжынер па арганізацыі і нарміраванню працы Цэнтра распрацоўкі нарматываў для арганізацыі і нармавання працы Аліна Захарэўская. Сваю работу дзяўчына стварала на кампутары з дапамогай графічнага рэдактара.

Другое месца ў намінацыі «Лепшы плакат» заваявала работа вядучага інжынера аддзела капітальнага будаўніцтва і праектавання Магілёўскага аддзялення Антона Шнэйдэрава. Замыкае прызавую тройку плакат метадыста клубнай установы Культурна-спартыўнага цэнтра Мінскага аддзялення Ксеніі Шэшко.

Як адзначыў пры падвядзенні вынікаў конкурсу старшыня журы намеснік Начальніка Беларускай чыгункі Пётр Стоцкі, пры разглядзе прадстаўленых работ улічвалася іх адпаведнасць заяўленай тэматыцы, глыбіня раскрыцця тэмы, крэатыўнасць, якасць выканання, патэнцыйная магчымасць далейшага выкарыстання як сацыяльнай антыкарупцыйнай рэкламы, мастацка-эмацыянальнае ўздзеянне, адлюстраванне свайго ўласнага стаўлення да выбранай тэмы, інфарматыўнасць і г. д.

«На Беларускай чыгунцы вялікая ўвага надаецца прафілактыцы карупцыйных праяў. Дадзеная работа праводзіцца на сістэмнай аснове», – падкрэсліў Пётр Васільевіч. «Задача конкурсу – дадаткова прыцягнуць увагу моладзі да гэтай негатыўнай сацыяльнай з'явы, далучыць да дзейнасці па недапушчэнні карупцыйных праяў, да стварэння атмасферы нецярпімасці да падобных фактаў у працоўных калектывах. «Чыгунка супраць карупцыі» – гэтая ідэя прайшла лейтматывам праз усе прадстаўленыя работы».

Пераможцы і прызёры конкурсу будуць адзначаны грашовымі прэміямі, а іх работы накіруюць на Міжнародны маладзёжны конкурс сацыяльнай антыкарупцыйнай рэкламы «Разам супраць карупцыі!», арганізатарам якога з'яўляецца Генеральная пракуратура Расійскай Федэрацыі, а суарганізатарамі – аналагічныя ведамствы Беларусі, Арменіі, Кыргызстана, Агенцтва Рэспублікі Казахстан па справах дзяржаўнай службы і супрацьдзеянні карупцыі, Агенцтва па дзяржаўным фінансавым кантролі і барацьбе з карупцыяй Рэспублікі Таджыкістан.