Каманда Віцебскага аддзялення – пераможца адкрытага чэмпіянату Беларускай чыгункі па турысцка-прыкладным мнагабор'і

26 верасня 2023

Напярэдадні Сусветнага дня турызму 22-24 верасня 2023 г. на базе аздараўленчага лагера «Магістраль» Віцебскага аддзялення Беларускай чыгункі адбыўся адкрыты чэмпіянат Беларускай чыгункі па турысцка-прыкладным мнагабор'і. У чэмпіянаце прынялі ўдзел 6 каманд аддзяленняў Беларускай чыгункі і каманда Гомельскага вагонабудаўнічага завода.

У першы дзень чэмпіянату прайшлі спаборніцтвы па тэхніцы веласіпеднага турызму. Удзельнікам неабходна было пераадолець набор «фігур» і прадэманстраваць навыкі валодання веласіпедам: круг, варота, змейка, арэлі, стоп-лінія і іншыя. Затым удзельнікі пераадольвалі дыстанцыю ў 5 км з крутымі ўздымамі і спускамі, пясчанымі ўчасткамі. Лепшымі на этапе сталі спартсмены Віцебскага аддзялення чыгункі.

У спартыўным арыентаванні каманда з чатырох удзельнікаў з дапамогай карты, компаса і ліхтарыкаў пераадольвала дыстанцыю 8 км з 12 кантрольнымі пунктамі ў цёмны час сутак. Ва ўпартай барацьбе перамогу атрымала каманда Магілёўскага аддзялення чыгункі. Мінскае аддзяленне чыгункі ўступіла 1 хвіліну 23 секунды і заняло другое месца, на трэцім месцы – Віцебскае аддзяленне чыгункі.

Другі дзень спаборніцтваў пачынаўся з дыстанцыі тэхнікі пешаходнага турызму, на якой каманды арганізоўвалі навясную пераправу праз раку, праходзілі спуск па крутым схіле, пераадольвалі балота па бервяне і па гаці, дэманстравалі навыкі завязвання вузлоў, праходзілі радыяльны маятнік. Лепшы вынік паказала каманда віцебскіх чыгуначнікаў.

У другой палове дня адбыліся спаборніцтвы на байдарках у тэхніцы воднага турызму. Змяшанаму і мужчынскаму экіпажам неабходна было пераадолець дыстанцыю воднага слалама з 16 варотамі.

У камандным заліку першае месца заняла каманда Віцебскага аддзялення, другое месца ў Гомельскага аддзялення, замкнулі тройку прызёраў слаламісты Магілёўскага аддзялення. Абсалютна лепшы вынік сярод усіх экіпажаў – 3 мін 4 сек. паказалі прадстаўнікі мужчынскага экіпажа каманды Віцебскага аддзялення.

Апошнім відам чэмпіянату стала камбінаваная эстафета, якая ўключала ў сябе каманднае пераадоленне дыстанцыі пешаходнага турызму, фігурнае кіраванне веласіпедам і велакрос, спартыўнае арыентаванне, камандная гонка на байдарцы. Выйграла эстафету каманда Віцебскага аддзялення чыгункі. На другім месцы – Мінскае аддзяленне чыгункі, трэці вынік у каманды Гомельскага аддзялення чыгункі.

За тры дні няпростай і напружанай барацьбы першае месца адкрытага чэмпіянату па турысцка-прыкладным мнагабор'і прысуджана камандзе Віцебскага аддзялення чыгункі, другое – зборнай камандзе Магілёўскага аддзялення чыгункі, трэцяе – камандзе Гомельскага аддзялення чыгункі. Пераможцы і прызёры спаборніцтваў узнагароджаны дыпломамі, кубкамі, медалямі і прызамі.

Інфармацыя падрыхтавана прэс-цэнтрам БЧ