Дэлегацыя моладзі Беларускай чыгункі прыняла ўдзел у рабоце міжнароднай секцыі XV юбілейнага Злёту моладзі ААТ «РЖД»

26 верасня 2023

З 17 па 24 верасня 2023 г. у г. Маскве (Расійская Федэрацыя) прайшоў XV юбілейны Злёт моладзі ААТ «РЖД», у рабоце міжнароднай секцыі якога прыняла ўдзел дэлегацыя Беларускай чыгункі.

У рабоце Міжнароднай секцыі Злёту таксама ўдзельнічалі маладыя чыгуначнікі з Арменіі, Казахстана, Кітая, Кубы, Манголіі, Расіі, Таджыкістана, Узбекістана і інш.

У 2023 годзе Міжнародная секцыя Злёту стала ўнікальнай камунікацыйнай пляцоўкай па абмене вопытам, выпрацоўцы сумесных ініцыятыў, а таксама платформай для ўзаемадзеяння з міжнароднай маладзёжнай супольнасцю, фарміравання комплекснага ўяўлення аб прыярытэтных задачах, якія стаяць перад чыгуначнай галіной, умацавання прафесійных, сацыяльных і культурных сувязей.

На пляцоўцы міжнароднай секцыі Злёту былі арганізаваны рабочыя сустрэчы, панэльныя дыскусіі, бізнес-трэнінгі, наведванне чыгуначных аб'ектаў, а таксама розныя культурныя мерапрыемствы.

Дэлегацыя моладзі нашай магістралі прыняла ўдзел у фестывалі нацыянальных культур, дзе пазнаёміла іншых удзельнікаў міжнароднай секцыі Злёту з багатай культурай, традыцыямі і нацыянальнымі асаблівасцямі Рэспублікі Беларусь.

У зале праўлення ААТ «РЖД» адбылася афіцыйная сустрэча першага намесніка генеральнага дырэктара ААТ «РЖД» Сяргея Паўлава з удзельнікамі замежных моладзевых дэлегацый, у рамках якой былі абмеркаваны пытанні развіцця міжнароднай лагістыкі, кіравання чыгункамі за мяжой, навукаёмістых тэхналогій і IT-прадуктаў, а таксама падрыхтоўкі кадраў і развіцця персаналу.

Удзел прадстаўнікоў беларускай магістралі ў міжнароднай секцыі Злёту спрыяў умацаванню станоўчага іміджу беларускай чыгункі і Рэспублікі Беларусь на міжнароднай арэне, а таксама дазволіў абмяняцца вопытам работы па рэалізацыі маладзёжнай палітыкі на чыгунках дзяржаў-удзельніц Садружнасці Незалежных Дзяржаў.

Інфармацыя падрыхтавана прэс-цэнтрам БЧ