Беларуская чыгунка падвяла вынікі акцыі «Дзеці і бяспека»

15 верасня 2023

Акцыя «Дзеці і бяспека» была прымеркавана да пачатку навучальнага года ва ўстановах адукацыі і праводзілася на Беларускай чыгунцы з 1 па 10 верасня 2023 года. Асноўнай мэтай дадзенай акцыі з'яўляецца прафілактыка няшчасных выпадкаў з удзелам непаўналетніх на аб'ектах чыгуначнага транспарту.

У рамках правядзення прафілактычных мерапрыемстваў работнікамі БЧ ва ўзаемадзеянні з праваахоўнымі органамі былі арганізаваны 487 рэйдаў. Выяўлены і выведзены ў бяспечныя месцы 17 непаўналетніх, якія знаходзіліся на аб'ектах чыгункі без суправаджэння бацькоў або дарослых, а таксама 88 падлеткаў, якія размаўлялі па мабільным тэлефоне або пераходзілі чыгуначныя пуці ў навушніках.

Акрамя таго, спецыялістамі БЧ былі арганізаваны больш за 600 выступленняў ва ўстановах адукацыі і працоўных калектывах, на вакзалах і станцыях, падчас якіх дзецям і дарослым нагадалі правілы паводзін на аб'ектах чыгуначнага транспарту, а таксама расказалі пра наступствы іх парушэння. У дадзеных мерапрыемствах прынялі ўдзел больш за 35,6 тыс. чалавек, каля 33 тыс. з якіх – непаўналетнія. Распаўсюджана амаль 9 тыс. прафілактычных памятак.

Беларуская чыгунка надае вялікую ўвагу прафілактыцы невытворчага траўматызму і прымае ўсе магчымыя меры, каб выключыць выпадкі траўміравання грамадзян на чыгуначным транспарце.

У студзені-жніўні бягучага года адбылося 60 выпадкаў траўміравання грамадзян, не звязаных з вытворчасцю, што на 3 выпадкі менш, чым за аналагічны перыяд мінулага года. Разам з тым праблема застаецца актуальнай. Пацярпеў 61 грамадзянін (з іх – смяротна траўміраваны 2 непаўналетніх). За кожнай з гэтых лічбаў чалавечая трагедыя і боль.

Асноўнай прычынай няшчасных выпадкаў па-ранейшаму застаецца ігнараванне грамадзянамі элементарных мер бяспекі: размовы па мабільным тэлефоне і праслухоўванне музыкі ў навушніках падчас перасячэння чыгуначных пуцей, пераход чыгуначных пуцей у неўстаноўленых месцах перад надыходзячым цягніком, парушэнне вадзіцелямі правілаў дарожнага руху пры перасячэнні чыгуначных пераездаў, знаходжанне ў зоне павышанай небяспекі ў стане алкагольнага ап'янення і г. д.

Беларуская чыгунка ў чарговы раз заклікае грамадзян быць больш уважлівымі на аб'ектах чыгуначнага транспарту, звяртаць увагу на папераджальныя гукавыя сігналы і знакі, выконваць правілы бяспекі, берагчы сваё жыццё і жыццё сваіх блізкіх.

Інфармацыя падрыхтавана прэс-цэнтрам БЧ