18 красавіка 2023 года ў Мінску адбыўся конкурс «Наш лёс звязала магістраль» сярод сямейных пар работнікаў БЧ
19 красавіка 2023
Конкурс «Наш лёс звязала магістраль» сярод сямейных пар работнікаў БЧ прайшоў у Мінскім Палацы культуры і спорту чыгуначнікаў. У творчым спаборніцтве прынялі ўдзел 6 сямейных пар, якія пазнаёміліся і стварылі свае сем'і, з'яўляючыся работнікамі Беларускай чыгункі.
Конкурс праводзіўся ўпершыню і быў прымеркаваны да Года міру і стварэння. Ён арганізаваны з мэтай папулярызацыі сямейных каштоўнасцяў і станоўчага вопыту сямейных адносін.
Конкурс складаўся з пяці этапаў: «Свет нашага дома» – (прэзентацыя сямейных захапленняў, творчых работ), «Сямейны альбом» (відэапрэзентацыя пра сваю сям'ю), «Слаўная хата не кутамі, але пірагамі» – самы «смачны» этап конкурсу (прэзентацыя фірмовай стравы сям'і), «Кіно пра каханне» (веданне кінахронікі фільмаў пра каханне) і «Творчы тандэм».
Усе ўдзельнікі конкурсу праявілі незвычайную фантазію, паказалі сябе як таленавітыя, вясёлыя і вельмі дружныя пары, пакарылі гледачоў і журы адданасцю прафесіі чыгуначніка, любоўю да сваёй Радзімы, яе нацыянальных і культурных традыцый, запалам, эрудыцыяй, невычэрпным аптымізмам і кулінарным майстэрствам.
Кожная сям'я атрымала дыплом аб удзеле і каштоўныя падарункі ад Беларускай чыгункі і Аб'яднанай галіновай прафсаюзнай арганізацыі чыгуначнікаў і транспартных будаўнікоў.
Па выніках конкурсу першае месца прысуджана Аляксею і Дар'і Карповічам, работнікам Маладзечанскай дыстанцыі пуці Мінскага аддзялення чыгункі. 14 верасня 2023 года яны адсвяткуюць фаянсавае (рамонкавае) вяселле – 9 гадоў разам.
На другім месцы – сямейная пара Антона і Надзеі Купрацэвічаў, якія працуюць на станцыі Баранавічы-Цэнтральныя Баранавіцкага аддзялення магістралі. У ліпені муж і жонка адзначаць бляшанае вяселле. Разам у шчаслівым шлюбе яны ўжо амаль 8 гадоў.
Трэцяе месца заваявала сямейная пара Анатоля і Яўгеніі Таргашыных, работнікаў Гомельскага вагоннага ўчастка Гомельскага аддзялення чыгункі. У студзені муж і жонка адзначылі 9 гадоў сумеснага жыцця.
Дыпломы за актыўны ўдзел і прызы ад Аб'яднанай галіновай прафсаюзнай арганізацыі чыгуначнікаў і транспартных будаўнікоў былі ўручаны сем'ям Якаўлевых, Мацюта і Гранкіных.
Сяргей Якаўлеў, работнік Магілёўскай дыстанцыі грамадзянскіх збудаванняў, і яго жонка Алена, якая працуе ў Магілёўскім вагонным дэпо Магілёўскага аддзялення чыгункі, былі ўзнагароджаны за творчую разнастайнасць. Восенню 2023 года сямейная пара адзначыць ружовае вяселле – 17 гадоў шчаслівага шлюбу.
Юрый і Наталля Мацюта, праваднікі пасажырскіх вагонаў Брэсцкага вагоннага ўчастка Брэсцкага аддзялення чыгункі, былі адзначаны за волю да перамогі. У лістападзе гэтага года пара адсвяткуе фарфоравае вяселле, а гэта дваццацігоддзе сямейнага жыцця.
Віталь і Юлія Гранкіны, работнікі Полацкай дыстанцыі сігналізацыі і сувязі Віцебскага аддзялення беларускай магістралі атрымалі ўзнагароду за высокі ўзровень акцёрскага майстэрства. У гэтым годзе яны адзначаць 11 гадоў шчаслівага сямейнага жыцця і стальное вяселле.
Інфармацыя падрыхтавана прэс-цэнтрам БЧ