14 мая на Беларускай чыгунцы адбыўся Савет галоўных інжынераў

16 мая 2018

Чарговы Савет галоўных інжынераў пад старшынствам галоўнага інжынера БЧ Валерыя Шубадзёрава адбыўся ва Упраўленні Беларускай чыгункі. Пасяджэнне прайшло ў рэжыме відэаканферэнцыі. У ім прынялі ўдзел кіраўнікі службаў і аддзелаў Упраўлення Беларускай чыгункі, кіраўнікі арганізацый і адасобленых структурных падраздзяленняў беларускай магістралі, а таксама галоўныя інжынеры аддзяленняў дарогі.

Сярод тэм для абмеркавання: карэкціроўка інвестыцыйных планаў Беларускай чыгункі, пытанне аб мэтазгоднасці ўкаранення аўтаматызаванай сістэмы ўліку і кантролю электраэнергіі ў спажыўцоў з далучанай магутнасцю 750кВА і вышэй на прыкладзе УП «Баранавіцкае аддзяленне Беларускай чыгункі», развіццё сістэмы візуальнага і аўдыё інфармавання.

Намеснікам начальніка пасажырскай службы Аляксандрам Казачком на абмеркаванне Савета было вынесена пытанне аб стварэнні адзінай аўтаматызаванай сістэмы інфармавання пасажыраў аб руху цягнікоў на Беларускай чыгунцы з устаноўкай на станцыях і прыпыначных пунктах электронных табло інфармавання і сістэм аўдыё інфармавання з цэнтралізаваным кіраваннем.

Плануецца, што тэставая эксплуатацыя новай сістэмы інфармавання пачнецца на Беларускай чыгунцы ўжо да сакавіка 2019 года. Яна павінна забяспечыць цэнтралізаванае кіраванне апавяшчэннем і інфармаваннем на ўсіх станцыях і прыпыначных пунктах БЧ. Як расказаў Аляксандр Казачок, першапачаткова праект будзе рэалізаваны на станцыях Мінск-Пасажырскі, Беларусь і прыпыначным пункце Масюкоўшчына. На дадзеных аб'ектах плануецца ўсталяваць электронныя табло новага тыпу, на якіх будзе адлюстроўвацца як інфармацыя аб планавым часе прыбыцця цягнікоў, так і інфармацыя аб затрымках цягнікоў, інфармацыйныя паведамленні аператыўнага і рэкламнага характару. Рэалізацыя гэтага праекта дасць магчымасць адпрацаваць тыпавыя тэхнічныя і тэхналагічныя пытанні вядзення і актуалізацыі інфармацыі, візуальнага і аўдыё прадстаўлення інфармацыі пасажырам, што ў сваю чаргу дасць магчымасць палепшыць інфармацыйнае забеспячэнне станцый і прыпыначных пунктаў.

Інфармацыя падрыхтавана прэс-цэнтрам БЧ