Беларуская чыгунка напярэдадні вясновых школьных канікул правядзе акцыю «Дзеці і бяспека»

13 сакавіка 2024

З 13 па 22 сакавіка 2024 года напярэдадні вясновых школьных канікул БЧ традыцыйна правядзе комплекс мерапрыемстваў «Дзеці і бяспека». Іх асноўная мэта – прафілактыка няшчасных выпадкаў з удзелам непаўналетніх на аб'ектах чыгуначнага транспарту.

Падчас акцыі работнікі беларускай магістралі правядуць прафілактычныя гутаркі ў навучальных установах і на прадпрыемствах, размешчаных у непасрэднай блізкасці ад чыгункі.

Разам з членамі грамадскіх фарміраванняў, супрацоўнікамі органаў унутраных спраў на аб'ектах чыгуначнага транспарту будуць арганізаваны рэйды. У цэнтры ўвагі апынуцца дзеці і падлеткі, якія знаходзяцца без нагляду дарослых паблізу чыгуначных пуцей, на вакзалах, станцыях і ў цягніках.

Таксама на вакзалах і ў цягніках грамадзян дадаткова праінфармуюць аб мерах бяспекі пры знаходжанні на аб'ектах чыгуначнага транспарту.

Работа па папярэджанні няшчасных выпадкаў на аб'ектах чыгуначнага транспарту праводзіцца на Беларускай чыгунцы рэгулярна і знаходзіцца на асаблівым кантролі.

Нягледзячы на меры, якія прымаюцца, паводле аператыўных даных з пачатку 2024 года на аб'ектах чыгуначнага транспарту адбылося 15 выпадкаў невытворчага траўматызму, што на 1 выпадак менш, чым за аналагічны перыяд 2023-га. Колькасць пацярпелых у бягучым годзе склала 15 чалавек, з якіх 12 траўміраваны смяротна.

Беларуская чыгунка ў чарговы раз нагадвае грамадзянам аб неабходнасці быць больш уважлівымі на аб'ектах чыгуначнага транспарту і выконваць правілы бяспекі.

Інфармацыя падрыхтавана прэс-цэнтрам БЧ