Каманда Мінскага аддзялення – пераможца конкурсу па інтэлектуальных гульнях сярод маладзёжных каманд аддзяленняў Беларускай чыгункі

08 снежня 2023

7 снежня 2023 года на базе Культурна-спартыўнага цэнтра Віцебскага аддзялення чыгункі адбыўся конкурс па інтэлектуальных гульнях сярод маладзёжных каманд аддзяленняў Беларускай чыгункі.

У гэтым годзе інтэлектуальнае спаборніцтва, як і многія іншыя мерапрыемствы, якія праводзяцца на Беларускай чыгунцы, было прымеркавана да Года міру і стварэння, а таму частка пытанняў была звязана са значнымі падзеямі ў гісторыі Рэспублікі Беларусь. Таксама асобны этап конкурсу прысвяцілі гісторыі станаўлення і развіцця беларускай магістралі.

Кожнае з шасці аддзяленняў чыгункі прадставіла каманда, якая перамагла ў адборачным туры.

Конкурс складаўся з шасці этапаў: «Візітная картка», «Віктарына «PRO.Беларусь», прафесійны этап «Усё пра цябе, сталёвая магістраль!», «Эрудыт-красворд «Да міру і ўзаемаразумення», «З стагоддзя ў стагоддзе» і «Інтэлектуальны магазін». Усе каманды паказалі высокі ўзровень ведаў, у тым ліку звязаных з прафесійнай дзейнасцю.

Мерапрыемства прайшло ў святочнай атмасферы і было напоўнена здаровым азартам і імкненнем да перамогі.

У выніку па агульнай суме балаў лепшай стала каманда Мінскага аддзялення чыгункі, другое месца заваявалі прадстаўнікі Магілёўскага аддзялення чыгункі, а трэцяе месца на пераможным п'едэстале заняла каманда Баранавіцкага аддзялення Беларускай чыгункі.

Інфармацыя падрыхтавана прэс-цэнтрам БЧ