Цягнікі ў Новы год

30 ноября 2015

Навагоднія цягнікі з Мінска ў маёнтак Дзеда Мароза ў Нацыянальным парку «Белавежская пушча» адправяцца 25 снежня, а таксама 2,4 і 8 студзеня. Саставы з вагонаў купэ будуць абслугоўваць правадніцы-снягуркі.

Падарожжа арганізаваў турыстычны цэнтр Мінскага аддзялення БЧ і падабраў насычаную экскурсійную праграму. Напрыклад, можна будзе наведаць домік Снягуркі, зазірнуць у музей падарункаў «Скарбніца», убачыць чароўны калодзеж і казачны ветраны млын, загадаць жаданне на паляне казак і атрымаць навагодні падарунак ад самога Дзеда Мароза. У праграму тура таксама ўваходзіць знаёмства з Музеем прыроды Нацыянальнага парку «Белавежская пушча» і прагулка ўздоўж вальераў з жывёламі. У перапынках паміж экскурсіямі турысты паласуюцца блінамі і гарачай гарбатай на пушчанскіх травах.

Святочныя цягнікі будуць адпраўляцца са станцыі Мінск-Пасажырскі ў 22.48 і прыбываць у Брзст каля 8 гадзін раніцы. Адтуль турыстаў даставяць у Белавежскую пушчу на аўтобусах, па дарозе экскурсавод раскажа гасцям аб традыцыях святкавання Раства і Новага года.

У маёнтку Дзеда Мароза турысты правядуць цэлы дзень. Назад з Брэста святочны цягнік адправіцца ў 18.12 і прыбудзе ў Мінск у 22.34.

Кошт тура ў купэйным вагоне складае каля 710 тысяч для дарослых, 670 тысяч для дзяцей 10-16 гадоў і 570 тысяч для дзяцей 2-10 гадоў. Расцэнкі для плацкартнага вагона — 670,630 і 545 тысяч адпаведна. Навагодняя форма адзення вітаецца.

Іна Гарбаценка

Рэспубліка

28.11.2015