Дэлегацыя Беларускай чыгункі 24–25 жніўня 2023 года прыняла ўдзел у XI Міжнародным чыгуначным салоне прасторы 1520 «PRO//Движение.Экспо», які праходзіць на тэрыторыі Музея чыгунак Расіі ў г. Санкт-Пецярбургу
25 жніўня 2023
«PRO//Движение.Экспо» з'яўляецца ўнікальнай міжнароднай камунікацыйнай пляцоўкай для сустрэчы прадстаўнікоў найбуйнейшых кампаній, экспертаў і спецыялістаў у галіне чыгуначнага транспарту, а таксама дэманстрацыі і прасоўвання сучасных тэхналогій. Свае дасягненні і распрацоўкі ў галіне чыгуначнага машынабудавання, мадэрнізацыі інфраструктуры, стварэння аўтаматызаванага дыягнастычнага абсталявання, электронікі і сістэм кіравання прадставілі найбуйнейшыя кампаніі транспартнай галіны.
Дзелавая праграма салона «PRO//Движение.Экспо» прайшла ў фарматах пленарных і панэльных дыскусій, а таксама круглых сталоў.
Дэлегацыю беларускай магістралі ўзначаліў галоўны інжынер Беларускай чыгункі Сяргей Навадворскі.
Прадстаўнікі БЧ прынялі ўдзел у рабоце шэрагу дыскусій: «Чыгуначная галіна ў эпоху пераменаў. Умовы дасягнення тэхналагічнай незалежнасці», «Імпартанезалежныя лакаматывы. Задачы і магчымасці», «Інавацыі. Вектар супрацоўніцтва», «Абарот вагона. Паскарэнне руху vs прафіцыт парку», «Вагоны тэхналагічнага суверэнітэту. Канцэпт будучыні», «Перспектывы развіцця транспарту і чыгуначнага машынабудавання. Вобраз 2030» і інш.
У рамках панэльнай дыскусіі «Інавацыі. Вектар супрацоўніцтва» Сяргей Навадворскі выступіў з дакладам «Крытычны імпарт і імпартазамяшчэнне высокатэхналагічнай прадукцыі, камунікацыі з ААТ «РЖД». У ходзе выступлення было адзначана, што Беларуская чыгунка і ААТ «РЖД» сумесна ажыццяўляюць вырашэнне агульных задач і праблемных пытанняў па крытычным імпарце важных вузлоў і элементаў чыгуначнай прадукцыі, развіцці кааперацыйных сувязяў і выяўленні інавацыйных складальнікаў.
Таксама спецыялісты Беларускай чыгункі наведалі выставачную экспазіцыю салона, дзе змаглі азнаёміцца з найноўшымі ўзорамі чыгуначнай тэхнікі.
25 жніўня 2023 года галоўны інжынер Беларускай чыгункі прыняў удзел у рабочай сустрэчы з кіраўніцтвам Кастрычніцкай чыгункі – філіяла ААТ «РЖД», падчас якой былі абмеркаваны актуальныя пытанні двухбаковага супрацоўніцтва.
Акрамя таго, у рамках XI Міжнароднага чыгуначнага салона прасторы 1520 «PRO//Движение.Экспо» паміж Беларускай чыгункай і ААТ «РЖД» падпісана пагадненне аб супрацоўніцтве па мадэрнізацыі і развіцці участкаў інфраструктуры чыгуначнага транспарту агульнага карыстання для асваення перспектыўных аб'ёмаў грузаў, якія перавозяцца па 9-м агульнаеўрапейскім транспартным калідоры, у напрамку партоў Паўночна-Заходняга рэгіёну Расійскай Федэрацыі. Пагадненне прадугледжвае разлічаны да 2026 года план мерапрыемстваў інфраструктурнага развіцця.
Таксама паміж Беларускай чыгункай і ААТ «РЖД» было падпісана Пагадненне аб намерах па фарміраванні адзінай сістэмы тэхнічнага аўдыту на прадпрыемствах, якія ажыццяўляюць выраб, рамонт і мадэрнізацыю прадукцыі чыгуначнага прызначэння.
Бакі распрацуюць адзіныя падыходы да правядзення тэхнічнага аўдыту сістэм менеджменту, працэсаў вырабу, рамонту прадукцыі чыгуначнага прызначэння і будуць праводзіць узгодненую навукова-тэхнічную палітыку ў гэтай галіне. Таксама плануецца сумесна развіваць аўтаматызацыю і цыфравізацыі працэсу тэхнічнага аўдыту. Будзе нададзена ўвага павышэнню якасці прадукцыі чыгуначнага прызначэння, дасягненню яе высокай надзейнасці, даўгавечнасці і памяншэнню негатыўнага ўздзеяння на навакольнае асяроддзе. Усё гэта дасць магчымасць рэалізаваць асноўныя задачы па кіраванні якасцю чыгуначнай прадукцыі на міждзяржаўным узроўні, максімальна выключыць выпадкі прымянення неадпаведнай і кантрафактнай прадукцыі, павысіць бяспеку і якасць паслуг.
Інфармацыя падрыхтавана прэс-цэнтрам БЧ
Да спісу навін за 2023 год