У Мінску пачаў работу Шосты злёт машыністаў Беларускай чыгункі

25 кастрычніка 2022

Шосты злёт машыністаў Беларускай чыгункі пройдзе ў сталіцы Рэспублікі Беларусь 25-26 кастрычніка 2022 года.

Адкрыццё форуму адбылося ў мінскім Палацы культуры і спорту чыгуначнікаў. На мерапрыемства прыехалі больш за 200 машыністаў, машыністаў-інструктараў і памочнікаў машыністаў з усіх 17 лакаматыўных дэпо БЧ. Сярод удзельнікаў злёту – кіраўніцтва беларускай магістралі і аддзяленняў чыгункі, кіраўнікі і спецыялісты галіновых службаў, прадстаўнікі прафсаюзных арганізацый, ветэраны працы, якія ў розныя гады ўзначальвалі лакаматыўныя дэпо і ўнеслі значны ўклад у развіццё і забеспячэнне стабільнай работы Беларускай чыгункі, а таксама дэлегацыя чыгуначнікаў з Расійскай Федэрацыі на чале з намеснікам начальніка Дырэкцыі цягі – філіяла ААТ «РЖД» Мікалаем Міхальчуком.

У мерапрыемстве прыняў удзел намеснік Міністра транспарту і камунікацый Сяргей Дубіна.

Адкрыў Шосты злёт машыністаў Начальнік Беларускай чыгункі Уладзімір Марозаў. Ён адзначыў важную ролю прафесіі машыніста ў арганізацыі работы беларускай магістралі. «Менавіта машыніст забяспечвае завяршальны этап арганізацыі перавозкі пасажыраў і грузаў і нясе адказнасць за іх бяспеку і выкананне графіка руху. У няштатнай сітуацыі ў дарозе менавіта ад яго залежыць прыняцце адзінага правільнага і канчатковага рашэння па далейшых дзеяннях».

Уладзімір Марозаў праінфармаваў удзельнікаў мерапрыемства аб рабоце Беларускай чыгункі і выкананні рашэнняў Пятага злёту машыністаў.

Вялікую ўвагу Начальнік чыгункі надаў рабоце лакаматыўнай гаспадаркі. Ён адзначыў, што яна аказвае істотны ўплыў на павышэнне эфектыўнасці дзейнасці беларускай магістралі, рост прадукцыйнасці працы і зніжэнне сабекошту перавозак. «Сягоння лакаматыўная гаспадарка чыгункі ўяўляе сабой магутны комплекс вытворчага і кадравага патэнцыялу».

Адным з найважнейшых напрамкаў развіцця і павышэння эфектыўнасці работы лакаматыўнай гаспадаркі Уладзімір Марозаў назваў стварэнне аптымальных умоў для павышэння якасці абслугоўвання рухомага саставу з максімальным выкарыстаннем існуючых вытворчых плошчаў і тэхналагічнага абсталявання лакаматыўных дэпо. Ён таксама адзначыў, што за апошнія гады ў шэрагу лакаматыўных дэпо праведзена рэканструкцыя вытворчых магутнасцяў і ўведзены ў эксплуатацыю рамонтныя пазіцыі для розных відаў абслугоўвання парку рухомага саставу.

У сваім выступленні Начальнік Беларускай чыгункі надаў асаблівую ўвагу пытанням забеспячэння бяспекі руху і эксплуатацыі чыгуначнага транспарту, аховы працы і ролі кадравага патэнцыялу ў развіцці магістралі.

Сягоння на Беларускай чыгунцы працуюць больш за пяць тысяч работнікаў лакаматыўных брыгад. З іх амаль 40% мае вышэйшую і сярэднюю спецыяльную адукацыю. Больш за 65% мае стаж работы звыш 10 гадоў і каля 30% – звыш 20 гадоў. Аб высокім прафесійным узроўні машыністаў сведчыць і той факт, што амаль 1500 машыністаў маюць першы і другі клас кваліфікацыі. Штогод іх колькасць узрастае.

За 2021 год і 9 месяцаў 2022 года ў Чыгуначным цэнтры па падрыхтоўцы, перападрыхтоўцы і павышэнню кваліфікацыі кадраў навучана больш за 1500 работнікаў лакаматыўнай гаспадаркі, у тым ліку з прысваеннем кваліфікацыйнага разраду па прафесіях машыніст і памочнік машыніста.

Вялікая ўвага надаецца пытанням аховы здароўя чыгуначнікаў. За 9 месяцаў 2022 года ў санаторыях Беларускай чыгункі аздаравіліся больш за 460 работнікаў лакаматыўных брыгад.

На чыгунцы маюцца ўсе ўмовы не толькі для эфектыўнай працы, але і для дастойнай падтрымкі работнікаў.

За высокі прафесіяналізм у цяперашні час 183 работніка лакаматыўных брыгад узнагароджаны нагрудным знакам «За безаварыйны прабег на лакаматыве 1 000 000 км» і 146 чалавек – знакам «За безаварыйны прабег на лакаматыве 500 000 км». У рамках Шостага злёту гэтыя заслужаныя ўзнагароды будуць уручаны яшчэ 43 работнікам беларускай магістралі.

Таксама за шматгадовую добрасумленную працу, бездакорнае выкананне службовых абавязкаў і адданасць прафесіі аб'яўлена Падзяка Начальніка Беларускай чыгункі 6 машыністам, якія за сваю працоўную дзейнасць праехалі парадку 2 мільёнаў кіламетраў.

У рамках адкрыцця форуму з прывітальным словам да прысутных звярнуўся намеснік Міністра транспарту і камунікацый Рэспублікі Беларусь Сяргей Дубіна. Ён пажадаў удзельнікам Шостага злёту плённай работы, а таксама зачытаў прывітальны адрас, накіраваны ўдзельнікам форуму Намеснікам Прэм'ер-міністра Рэспублікі Беларусь Анатолем Сіваком.

Перад удзельнікамі злёту таксама выступіў старшыня Аб'яднанай галіновай прафсаюзнай арганізацыі чыгуначнікаў і транспартных будаўнікоў Віктар Какора.

Злёт працягнуў сваю работу ў фармаце пяці тэматычных круглых сталоў, у рамках якіх будуць закрануты больш за 50 актуальных пытанняў развіцця лакаматыўнай гаспадаркі.

Злёты машыністаў Беларускай чыгункі праводзяцца з 2010 года. У цяперашні час гэтыя мерапрыемствы сталі выніковай пляцоўкай для абмеркавання актуальных тэм, накіраваных на павышэнне эфектыўнасці дзейнасці не толькі лакаматыўнай гаспадаркі, але і ўсёй Беларускай чыгункі.

Інфармацыя падрыхтавана прэс-центрам БЧ