Міжнародны чыгуначны турызм. Першыя рэйсы здзейсніў турыстычны цягнік «Беларускі ваяж» – новы сумесны праект беларускіх і расійскіх чыгуначнікаў
15 жніўня 2022
6 і 13 жніўня 2022 года спецыяльныя турыстычныя цягнікі «Беларускі ваяж» даставілі ў Беларусь гасцей з Расіі. Туры разлічаны на двухдзённае знаходжанне ў Рэспубліцы Беларусь. Для турыстаў арганізавалі насычаныя выхадныя – круіз па краіне з прыпынкамі ў Брэсце, Гродне і Мінску.
Асаблівасць круізнага турыстычнага цягніка – начныя пераезды ў фармаце «атэль на колах» (у вагонах купэ і СВ) і працяглыя стаянкі ў Брэсце, Гродне і Мінску. Пры гэтым пасажыры маглі выбраць маршрут у адпаведнасці са сваімі перавагамі – пасля прыбыцця ў Беларусь частка вагонаў з турыстамі адправілася ў Брэст, а частка – у Гродна. У гэтых абласных цэнтрах для гасцей былі запланаваны разнастайныя праграмы.
Так, у Брэсце адбылася аглядная экскурсія па горадзе, наведванне Музея абароны Брэсцкай крэпасці, экскурсія ў Нацыянальны парк «Белавежская пушча» з абедам на Царскай паляне, аглядам музея прыроды і вальераў, а таксама прагулкі па гістарычным цэнтры.
У Гродне ў праграму першага дня ўключылі канцэрт арганнай музыкі, прагулкі па вулачках гістарычнага цэнтра, візіт у Стары замак і аграсядзібу «Каралінскі фальварак Тызенгаўза».
Раніцай другога дня турыстаў чакала экскурсія па Мінску, а таксама наведванне замкавага комплексу «Мір» – унікальнага помніка нацыянальнай культуры Беларусі, уключанага ў Спіс сусветнай культурнай і прыроднай спадчыны ЮНЕСКА.
Адзначым, што гэта першы рэалізаваны сумесны праект, арыентаваны на ўязны турызм, у рамках якога можна пазнаёміцца з унікальнай архітэктурнай і гістарычнай спадчынай Беларусі, дакрануцца да яе багатай культуры, у поўнай меры адчуць цяпло беларускай гасціннасці.
Першыя рэйсы паказалі высокую цікавасць да дадзенага праекта. У цяперашні час вывучаецца магчымасць арганізацыі курсіравання турыстычнага цягніка «Беларускі ваяж» на рэгулярнай аснове.
Інфармацыя падрыхтавана прэс-цэнтрам БЧ