Важнейшыя аспекты праекта змяненняў і дапаўненняў Канстытуцыі Беларусі абмеркавалі на сустрэчы, якая прайшла 31 студзеня ў Цэнтры кіравання перавозкамі Беларускай чыгункі

01 лютага 2022

Мерапрыемства адбылося з удзелам члена Канстытуцыйнай камісіі і Нацыянальнай Паралімпійскай зборнай, мнагакратнага рэкардсмена свету і Еўропы Аляксея Талая.

У зале нарад ЦКП сабраліся работнікі прадпрыемстваў Мінскага чыгуначнага вузла. Яны пазнаёміліся з драматычным лёсам Аляксея Талая, які, нягледзячы на найцяжэйшыя выпрабаванні лёсу, здолеў пераадолець шматлікія цяжкасці і стаў сімвалам імкнення да жыцця, бязмернай любві да сваёй сям'і і роднай айчыны.

Аднойчы сказаўшы сабе, што няма нічога немагчымага, сёння ён імкнецца дапамагчы паверыць у сябе і іншым, рэгулярна выступае на матывіруючых семінарах, займаецца спортам, прымае актыўны ўдзел у грамадска-палітычным жыцці краіны, а з дапамогай дабрачыннага фонду імкнецца дапамагчы дзецям, якія маюць патрэбнасць ў лячэнні.

Аляксей нарадзіўся ў Оршы і вырас у чыгуначнай сям'і. Марыў стаць машыністам лакаматыва. Таму, як прызнаўся ў час сустрэчы, ён вельмі рады магчымасці пагутарыць з чыгуначнікамі. Паводле яго слоў, сталёвая магістраль заўсёды славілася сваёй надзейнасцю і слаўнымі працоўнымі традыцыямі, якія перадаваліся з пакалення ў пакаленне.

І гэта сугучна з ідэямі, якія знайшлі адлюстраванне ў праекце змяненняў і дапаўненняў Асноўнага Закона нашай краіны. Канстытуцыйная камісія, у дзейнасці якой прымаў актыўны ўдзел Аляксей Талай, абапіралася на думкі жыхароў Беларусі. Напрыклад, толькі ў рамках усенароднага абмеркавання паступіла каля 9 тысяч заўваг і прапаноў. У выніку ў вынесеным на Рэферэндум дакуменце вялікая ўвага ўдзелена, у прыватнасці, умацаванню традыцыйных сямейных каштоўнасцяў, захаванню гістарычнай памяці. Прынцып пераемнасці выкананы і ў раздзелах, якія адлюстроўваюць іншыя аспекты развіцця грамадства і дзяржавы.

Акрамя гэтага, у ліку прыярытэтаў застаецца сацыяльная палітыка. У далейшым дадатковыя намаганні, на думку Аляксея, неабходна зрабіць для стварэння безбар'ернага асяроддзя. Зручны транспарт і даступная гарадская інфраструктура важныя не толькі для людзей з інваліднасцю, якія перасоўваюцца на калясках, але і для фізічна аслабленых пажылых асоб, а таксама маладых бацькоў з дзецьмі.

У завяршэнне сустрэчы Аляксей Талай адказаў на пытанні прысутных аб той напружанай і карпатлівай працы, якая папярэднічала падрыхтоўцы праекта змяненняў і дапаўненняў Канстытуцыі Рэспублікі Беларусь і заклікаў усіх чыгуначнікаў прыняць актыўны ўдзел у Рэферэндуме.

Аналагічныя мерапрыемствы, па абмеркаванні важнейшых для будучыні нашай краіны пытанняў, праходзяць ва ўсіх арганізацыях Беларускай чыгункі. У студзені 2022 года ў працоўных калектывах галіны адбылося ўжо больш за 180 сустрэч, дыялогавых пляцовак і форумаў з удзелам прадстаўнікоў заканадаўчай і выканаўчай улады.

Інфармацыя падрыхтавана прэс-цэнтрам БЧ