16 лістапада 2021 года споўнілася 150 гадоў з дня адкрыцця рэгулярных чыгуначных зносін Масква–Брэст

17 лістапада 2021

Беларуская чыгунка арганізавала на вакзале станцыі Брэст-Цэнтральны ўрачыстае мерапрыемства, прысвечанае 150-годдзю з дня адкрыцця рэгулярных чыгуначных зносін Масква–Брэст.

Ва ўрачыстым мерапрыемстве прынялі ўдзел: старшыня Брэсцкага абласнога выканаўчага камітэта Юрый Шулейка, намеснік Міністра сувязі і інфарматызацыі Рэспублікі Беларусь Наталля Гардзеенка, старшыня Брэсцкага гарадскога выканаўчага камітэта Аляксандр Рагачук, консул-саветнік Генеральнага консульства Расійскай Федэрацыі ў Брэсце Павел Марозаў, Начальнік Беларускай чыгункі Уладзімір Марозаў, першы намеснік генеральнага дырэктара ААТ «РЖД» Сяргей Паўлаў, Начальнік Маскоўскай чыгункі – філіяла ААТ «РЖД» Міхаіл Глазкоў, генеральны дырэктар, старшыня праўлення АТ «АТЛК ЕРА» Аляксей Гром, дэлегацыя ААТ «РЖД», работнікі і ветэраны БЧ.

Выступаючы перад прысутнымі Начальнік Беларускай чыгункі Уладзімір Марозаў адзначыў, што за доўгія гады свайго існавання чыгуначная лінія Масква–Брэст адыграла найважнейшую ролю ў многіх гістарычных падзеях. Яна мела стратэгічнае значэнне ў перыяд Першай сусветнай і Вялікай Айчыннай войнаў, а ў мірны час стала стваральным сувязным звяном паміж Усходам і Захадам.

Уладзімір Марозаў падкрэсліў, што сёння, як і шмат гадоў таму, чыгуначныя зносіны Брэст–Масква маюць важнае эканамічнае і грамадска-палітычнае значэнне. Штогод больш за 1 мільён 200 тысяч жыхароў Расіі і Беларусі здзяйсняюць паездкі па дадзеным кірунку. У 2020 годзе аб'ём перавозак грузаў паміж дзвюма краінамі склаў 41,3 млн. тон, а за 10 месяцаў 2021 года перавезена 34,4 млн.тон грузаў.

Як адзначыў першы намеснік генеральнага дырэктара ААТ «РЖД» Сяргей Паўлаў, «сягоння чыгуначная лінія Масква–Брэст уваходзіць у склад міжнароднага транспартнага калідора Усход–Захад і з'яўляецца асноўным сувязным звяном паміж Еўропай і Азіяй, асноўным напрамкам, па якім ажыццяўляюцца чыгуначныя пасажырскія і грузавыя перавозкі з Расіі, Казахстана, Кітая ў Беларусь, Еўропу і назад».

У рамках урачыстага мерапрыемства на вакзале станцыі Брэст-Цэнтральны адбылася цырымонія афіцыйнага гашэння паштовага праекта «150 гадоў чыгуначнай магістралі Смаленск–Мінск–Брэст», які быў выпушчаны ў абарачэнне да гэтай памятнай даты.

Таксама адбылося ўшанаванне пасажыра, які першым набыў білет на цягнік №28 Брэст–Масква адпраўленнем 16 лістапада 2021 года ў дзень 150-годдзя чыгуначных зносін Масква–Брэст. Ім стаў Дзмітрый Іркоў, жыхар горада Тамбова. Начальнік Беларускай чыгункі ўручыў яму сертыфікат юбілейнага пасажыра і памятны падарунак, падзякаваў за вернасць чыгунцы.

Для жыхароў і гасцей горада Брэста ў зале чакання вакзала станцыі Брэст-Цэнтральны была арганізавана гістарычная выстаўка, прысвечаная з'яўленню чыгуначных ліній на беларускіх землях, гісторыі і этапах развіцця Брэсцкага чыгуначнага вузла і Беларускай чыгункі ў цэлым.

У гэты ж дзень у Палацы чыгуначнікаў Брэсцкага аддзялення Беларускай чыгункі прайшла цырымонія ўзнагароджання працоўных калектываў прадпрыемстваў Аршанскага, Мінскага, Баранавіцкага і Брэсцкага чыгуначных вузлоў, якім у 2021 годзе таксама споўнілася 150 гадоў. Акрамя таго, больш за 50 работнікаў гэтых прадпрыемстваў былі ўдастоены вышэйшых галіновых узнагарод. Начальнік Беларускай чыгункі падзякаваў работнікам працоўных калектываў за любоў і адданасць прафесіі, узорнае выкананне сваіх службовых абавязкаў і імкненне зрабіць беларускую магістраль яшчэ лепш.

Асаблівыя словы падзякі Уладзімір Марозаў адрасаваў ветэранам прадпрыемстваў-юбіляраў, якія ўсё сваё жыццё прысвяцілі чыгуначнаму транспарту, а сёння з'яўляюцца прыкладам для моладзі.

Са словамі віншаванняў да прысутных таксама звярнуліся старшыня Аб'яднанай галіновай прафсаюзнай арганізацыі чыгуначнікаў і транспартных будаўнікоў Віктар Какора і старшыня арганізацыі ветэранаў чыгункі Сяргей Гогалеў.

ДАВЕДАЧНА

На працягу 2021 года Беларускай чыгункай у мэтах захавання пераемнасці пакаленняў, культурных і гістарычных традыцый рэалізавана вялікая колькасць мерапрыемстваў, прысвечаных 150 годдзю рэгулярных чыгуначных зносін Масква–Брэст.

У прыватнасці, на чыгуначных вакзалах у гарадах Орша, Барысаў, Мінск, Баранавічы, Брэст, Івацэвічы і Жабінка арганізаваны тэматычныя гістарычныя выстаўкі і фотазоны.

У цягніках, якія курсіруюць на ўчастку Масква–Мінск–Брэст, размешчаны плакаты і рэалізуецца прадукцыя з лагатыпам, прысвечаным 150-годдзю чыгуначных зносін Масква–Брэст.

На прадпрыемствах Беларускай чыгункі, якім у 2021 годзе спаўняецца 150 гадоў, праводзяцца вытворчыя спаборніцтвы, арганізавана ўшанаванне працоўных дынастый, праводзяцца «Дні адчыненых дзвярэй» для навучэнцаў выпускных класаў школ і гімназій, а таксама каледжаў, якія ажыццяўляюць падрыхтоўку кадраў для чыгуначнага транспарту, размешчаных у Оршы, Мінску і Брэсце.

На чыгуначных вузлах у Оршы, Мінску, Баранавічах і Брэсце адбыліся ўрачыстыя сходы і святочныя канцэрты з ушанаваннем калектываў работнікаў, перадавікоў вытворчасці, ветэранаў працы і ўручэннем узнагарод калектывам прадпрыемстваў, якія адзначаюць у 2021 годзе сваё 150-годдзе.

Таксама ў рамках святкавання 150-годдзя чыгуначных зносін Масква–Брэст на Беларускай чыгунцы арганізаваны Спартыўныя і культурна-масавыя мерапрыемствы.

У каледжах праводзяцца «Адкрытыя ўрокі» з удзелам кіраўнікоў і ветэранаў працы прадпрыемстваў Беларускай чыгункі, якім у 2021 годзе спаўняецца 150 гадоў. Таксама сярод навучэнцаў Брэсцкага і Аршанскага каледжаў – філіялаў установы адукацыі «Беларускі дзяржаўны ўніверсітэт транспарту» Беларуская чыгунка праводзіць конкурсы: творчых і даследчых работ «Лепшыя творчыя і даследчыя работы», аўтарскіх вершаў «Слаўлю цябе, родная магістраль», фатаграфій і малюнкаў на тэму «Гісторыя і сучаснасць маршруту Масква–Брэст».

У мінскім Палацы культуры і спорту чыгуначнікаў адбыўся інтэлектуальны конкурс, прымеркаваны да 150-годдзя чыгуначных зносін Масква–Брэст, паміж навучэнцамі каледжаў і работнікамі прадпрыемстваў Беларускай чыгункі.

Былі арганізаваны тэматычныя экскурсійныя праграмы для навучэнцаў выпускных класаў школ, гімназій, каледжаў у музеі Беларускай чыгункі ў г. Баранавічы і г. Брэсце, а таксама музеі і пакоі баявой і працоўнай славы прадпрыемстваў Беларускай чыгункі, якія адзначаюць у 2021 годзе 150-годдзе, праводзяцца тэматычныя мерапрыемствы на Дзіцячай чыгунцы імя К. С. Заслонава.

Інфармацыя падрыхтавана прэс-цэнтрам БЧ