З Беларусі ў Цэнтральную Азію. БЧ працягвае рэалізацыю новага праекта «Славянскі караван»

28 жніўня 2026

Першы грузавы цягнік па маршруце Рэспубліка Беларусь – Рэспубліка Узбекістан адправіўся 30 ліпеня 2026 года. Менш чым за месяц была забяспечана адпраўка з Беларусі ва Узбекістан ужо шасці скразных цягнікоў, перавезена больш за 24 тыс. тон грузаў беларускіх экспарцёраў. Маршрут праходзіць па тэрыторыі Расіі і Казахстана. Гэты праект беларуская магістраль рэалізуе сумесна з партнёрскімі чыгункамі.

Для кансалідацыі вагонаў з грузамі з усіх рэгіёнаў краіны выбрана станцыя Орша-Усходняя. Адсюль зборныя саставы з прадукцыяй дрэваапрацоўкі і харчовай прамысловасці, нафтапрадуктамі і хімікатамі ідуць на грузавую станцыю Чукурсай у межах Ташкента. Затым іх дастаўляюць да станцый прызначэння ў розных рэгіёнах Узбекістана.

Цікавасць грузаўладальнікаў да дадзенага сэрвісу працягвае расці. Важнай перавагай фармату скразнога цягніка з'яўляецца хуткасць дастаўкі і рэгулярнасць руху без перафармавання або затрымак у шляху. Акрамя таго, маецца магчымасць перавозкі грузаў транзітам праз Узбекістан у іншыя краіны Цэнтральнай і Паўднёвай Азіі.

У рамках праекта з мэтай развіцця экспартных паставак прадукцыі беларускіх прадпрыемстваў афіцыйным экспедытарам і лагістычным аператарам Беларускай чыгункі дзяржаўным прадпрыемствам «БЕЛІНТЭРТРАНС» прапрацавана магчымасць аказання сэрвісу па дастаўцы зборных грузаў у крытым вагоне і кантэйнеры.

Сёння частата адпраўлення цягніка – адзін раз у тыдзень, аднак перыядычнасць яго адпраўкі можа стаць больш частай, у залежнасці ад росту аб'ёмаў перавозак.

Таксама БЧ прапрацоўваюцца скразныя сэрвісы па перавозцы грузаў і ў іншыя рэгіёны.

Інфармацыя падрыхтавана прэс-цэнтрам БЧ