20 лістапада 2025 года прадстаўнікі Беларускай чыгункі прынялі ўдзел у лагістычным форуме-практыкуме «Тавар + пункт прызначэння = экспарт»
21 лістапада 2025
Форум быў арганізаваны Віцебскім аддзяленнем Беларускай гандлёва-прамысловай палаты. Яго асноўнай мэтай было абмеркаванне развіцця экспарту Беларусі з акцэнтам на лагістыку, аптымізацыю маршрутаў і зніжэнне выдаткаў пры пастаўках ва ўмовах сучасных выклікаў, уключаючы санкцыі і змены ў міжнародным гандлі.
На адной пляцоўцы ў канцэртнай зале «Віцебск» для абмеркавання надзённых праблем бізнесу і лагістыкі сабраліся больш за 150 прадстаўнікоў розных транспартна-лагістычных кампаній, прадпрыемстваў-экспарцёраў і перавозчыкаў.
Беларускую чыгунку на мерапрыемстве прадставілі першы намеснік начальніка Віцебскага аддзялення Беларускай чыгункі Кірыл Чарноў, намеснік начальніка аддзела грузавой работы Віцебскага аддзялення Аляксандр Лосеў і вядучы спецыяліст аддзела аналізу і развіцця грузавых перавозак службы грузавой работы і знешнеэканамічнай дзейнасці Ўпраўлення БЧ Арцём Гінько.
У цэнтры ўвагі ўдзельнікаў форуму былі ключавыя тэндэнцыі развіцця сусветных транспартных калідораў на 2025–2026 гады, эфектыўнасць мультымадальных перавозак, асаблівасці і рызыкі марскіх, чыгуначных, аўтамабільных і паветраных ліній, пошук аптымальных маршрутаў і відаў транспарту ва ўмовах санкцый і змяненняў глабальнага лагістычнага асяроддзя, а таксама перспектывы развіцця лагістыкі ў Азіі і Еўропе.
Спецыфіку арганізацыі грузаперавозак па тэрыторыі Віцебскай вобласці, наяўныя тэрмінальныя магутнасці для пагрузкі і адпраўлення кантэйнерных цягнікоў, а таксама перспектывы развіцця перавозак чыгуначным транспартам у Віцебскім рэгіёне прадставіў першы намеснік начальніка Віцебскага аддзялення Беларускай чыгункі Кірыл Чарноў. У сваім выступленні ён адзначыў перавагі выкарыстання чыгуначнага транспарту пры дастаўцы экспартных грузаў у краіны «далёкай дугі».
На форуме былі прадстаўлены практычныя кейсы, параўнальны аналіз транспартных рашэнняў і рэкамендацыі па павышэнні надзейнасці і эканамічнасці міжнародных перавозак. Удзельнікі сустрэчы разгледзелі асноўныя аспекты міжнароднай лагістыкі і перавозак: заключэнне і выкананне дагавораў, умовы перавозкі пры экспарце прадукцыі, здзелках, страхаванне грузаў, пытанні плацяжоў, а таксама ўзаемадзеянне мытнага і транспартнага заканадаўства.
Інфармацыя падрыхтавана прэс-цэнтрам БЧ
