Сёння, 11 снежня 2024 года, на Беларускай чыгунцы пачаў сваю работу VII злёт машыністаў

11 снежня 2024

Адкрыццё VII злёту машыністаў Беларускай чыгункі адбылося ў горадзе Брэсце ў Палацы культуры прафсаюзаў. Мерапрыемства сабрала амаль 300 удзельнікаў. У іх ліку кіраўніцтва беларускай магістралі і аддзяленняў чыгункі, кіраўнікі і спецыялісты профільных службаў, машыністы ўсіх 17 лакаматыўных дэпо, прадстаўнікі прафсаюзных арганізацый, а таксама чыгуначнікі з Расійскай Федэрацыі.

З дакладам перад удзельнікамі злёту выступіў Начальнік дзяржаўнага аб'яднання «Беларуская чыгунка» Валерый Вярэніч. Валерый Емяльянавіч праінфармаваў прысутных аб рабоце беларускай магістралі на сучасным этапе і перспектывах яе развіцця, а таксама аб выкананні рашэнняў VI злёту машыністаў. Ён адзначыў важнасць падобных сустрэч для абмеркавання актуальных пытанняў дзейнасці не толькі лакаматыўнай гаспадаркі, але і ўсіх удзельнікаў перавозачнага працэсу: «Злёт машыністаў дае магчымасць кіраўніцтву чыгункі з першых вуснаў пачуць прапановы, рэалізацыя якіх дапаможа павысіць эфектыўнасць і бяспеку эксплуатацыйнай работы Беларускай чыгункі».

Таксама да ўдзельнікаў злёту машыністаў звярнуўся старшыня Аб'яднанай галіновай прафсаюзнай арганізацыі чыгуначнікаў і транспартных будаўнікоў Ігар Камароўскі.

Злёт машыністаў Беларускай чыгункі ўпершыню праходзіць у горадзе Брэсце. Важнасць цеснага і канструктыўнага ўзаемадзеяння чыгуначнікаў і мясцовых органаў улады адзначыў старшыня Брэсцкага гарадскога выканаўчага камітэта Сяргей Лабадзінскі ў прывітальным слове. Ён падзякаваў кіраўніцтву беларускай магістралі за сумесную работу і пажадаў удзельнікам злёту на дыялогавых пляцоўках выпрацаваць патрэбныя алгарытмы для вырашэння пастаўленых задач.

Далей удзельнікі злёту працягнулі работу ў пяці тэматычных групах. На парадку дня пытанні эфектыўнай работы лакаматыўных брыгад, захавання правілаў аховы працы, узаемадзеяння з дыспетчарскім апаратам, захавання працоўнай дысцыпліны і многае іншае.

Вынікі пасяджэння рабочых груп будуць падведзены ў другі дзень злёту. Таксама ўдзельнікі наведаюць мемарыяльны комплекс  «Брэсцкая крэпасць-герой» і музей чыгуначнай тэхнікі.

Інфармацыя падрыхтавана прэс-цэнтрам БЧ