Сёмы злёт машыністаў Беларускай чыгункі прайшоў у горадзе Брэсце 11–12 снежня 2024 года

12 снежня 2024

У мерапрыемстве прынялі ўдзел машыністы ўсіх 17 лакаматыўных дэпо, кіраўніцтва Беларускай чыгункі і яе аддзяленняў, кіраўнікі і спецыялісты галіновых службаў, прадстаўнікі прафсаюзных арганізацый, ветэраны працы, якія ў розныя гады ўзначальвалі лакаматыўныя дэпо. Сярод ганаровых удзельнікаў злёту таксама былі прадстаўнікі ААТ «Расійскія чыгункі».

На абмеркаванне дэлегатаў злёту было вынесена каля 80 пытанняў, якія тычацца абнаўлення парку рухомага саставу, узаемадзеяння машыністаў з дыспетчарскім апаратам і сумежнымі службамі, актуалізацыі нарматыўных дакументаў і іншых важных тэм дзейнасці лакаматыўнай гаспадаркі. Прапановы, агучаныя ў ходзе выніковага пасяджэння, знайшлі сваё адлюстраванне ў пастанаўляючай частцы рашэння злёту і будуць дэталёва разгледжаны і прапрацаваны профільнымі спецыялістамі.

Падводзячы вынікі мерапрыемства, намеснік Начальніка Беларускай чыгункі Андрэй Якабсон падзякаваў усім за канструктыўную і плённую работу і выказаў упэўненасць, што прапановы, агучаныя ўдзельнікамі, дазволяць павысіць эфектыўнасць дзейнасці беларускай магістралі. Таксама ён адзначыў, што чыгуначнікі ва ўсе часы былі надзейнай апорай дзяржавы, і на цяперашнім пакаленні ляжыць асаблівая адказнасць за будучыню нашай краіны.

У рамках злёту Андрэй Львовіч уручыў нагрудныя Знакі за безаварыйны прабег на лакаматыве 500 000 кіламетраў і 1 000 000 кіламетраў лепшым машыністам.

Аддаючы даніну павагі бессмяротнаму подзвігу савецкага народа ў гады Вялікай Айчыннай вайны, дэлегаты VII злёту машыністаў наведалі мемарыяльны комплекс «Брэсцкая крэпасць-герой» і ўсклалі кветкі да Вечнага агню.

Інфармацыя падрыхтавана прэс-цэнтрам БЧ