Напярэдадні зімовых школьных канікул БЧ традыцыйна нагадае аб асноўных правілах бяспекі на чыгунцы

06 снежня 2024

З 13 па 24 снежня 2024 года напярэдадні зімовых школьных канікул Беларуская чыгунка правядзе акцыю «Дзеці і бяспека», у рамках якой будзе арганізаваны комплекс мерапрыемстваў, накіраваных на папярэджанне і прафілактыку дзіцячага траўматызму на аб'ектах чыгуначнага транспарту.

Для таго, каб яшчэ раз нагадаць школьнікам аб тым, што чыгунка – зона павышанай небяспекі, у гэты перыяд будуць праведзены прафілактычныя гутаркі ва ўстановах адукацыі, размешчаных у непасрэднай блізкасці ад чыгункі. Таксама будуць арганізаваны сустрэчы ў працоўных калектывах прадпрыемстваў.

На вакзалах, станцыях і ў цягніках падчас правядзення акцыі работнікі беларускай магістралі сумесна з праваахоўнымі органамі арганізуюць рэйды, падчас якіх нададуць асаблівую ўвагу дзецям і падлеткам, якія знаходзяцца без нагляду дарослых паблізу чыгуначных аб'ектаў.

Варта адзначыць, што, нягледзячы на актыўную і сістэмную работу Беларускай чыгункі па прафілактыцы і папярэджанні няшчасных выпадкаў з удзелам непаўналетніх, тэма дзіцячага траўматызму застаецца актуальнай. Так, з пачатку бягучага года на аб'ектах чыгуначнага транспарту смяротна траўміраваны 2 дзіцяці.

Адсутнасць кантролю з боку дарослых, гульні і няўважлівасць – асноўныя прычыны няшчасных выпадкаў з удзелам непаўналетніх.

Практыка паказвае, што дзеці, знаходзячыся паблізу або на чыгуначных пуцях, не чуюць сігнал надыходзячага цягніка з-за таго, што размаўляюць па мабільным тэлефоне ці слухаюць музыку ў навушніках. Заняцце «зацэпінгам», жаданне зрабіць «сэлфі» на небяспечных аб'ектах чыгуначнага транспарту таксама прыводзяць да трагедыі.

БЧ у чарговы раз заклікае бацькоў не пакідаць дзяцей без нагляду, і нагадвае, што чыгунка з'яўляецца зонай павышанай небяспекі. Перасякаць пуці неабходна толькі ў спецыяльна ўстаноўленых і абсталяваных для гэтага месцах. Пры іх перасячэнні неабходна пераканацца ў адсутнасці надыходзячага цягніка, звярнуць увагу на папераджальныя знакі. Хай зімовыя канікулы будуць бесклапотнымі, вясёлымі і бяспечнымі, здароўе і жыццё вашых дзяцей – гэта самае галоўнае!

Інфармацыя падрыхтавана прэс-цэнтрам БЧ