На Беларускай чыгунцы ўзнагародзілі лепшых рацыяналізатараў і арганізатараў тэхнічнай творчасці і пераможцаў конкурсу маладзёжных ініцыятыў
30 снежня 2024
27 снежня 2024 года ў дзень нараджэння Беларускай чыгункі ў Цэнтры кіравання перавозкамі з удзелам галоўнага інжынера магістралі Сяргея Навадворскага прайшла ўрачыстая цырымонія ўзнагароджання лепшых рацыяналізатараў і арганізатараў тэхнічнай творчасці і пераможцаў конкурсу маладзёжных ініцыятыў сярод работнікаў БЧ.
Удзельнікамі мерапрыемства сталі прадстаўнікі арганізацый Беларускай чыгункі, вядучыя пытанні рацыяналізатарскай і вынаходніцкай дзейнасці.
Выступаючы перад прысутнымі, галоўны інжынер Беларускай чыгункі Сяргей Навадворскі падзякаваў чыгуначнікам за плённую працу, накіраваную на агульны вынік. Сяргей Аляксандравіч падкрэсліў, што ўсе планы і задачы, пастаўленыя перад калектывам на 2024 год, выкананы: «Гэта заслуга кожнага работніка магістралі. Усе дасягненні пацвярджаюцца лічбамі эканамічных паказчыкаў»
У рамках урачыстага мерапрыемства галоўны інжынер Беларускай чыгункі Сяргей Навадворскі ўручыў лепшым рацыяналізатарам і арганізатарам тэхнічнай творчасці і пераможцам конкурсу маладзёжных ініцыятыў дыпломы. Сяргей Аляксандравіч павіншаваў чыгуначнікаў са 162-годдзем магістралі, пажадаў новых перамог і здзяйсненняў на прафесійнай ніве, моцнага здароўя, міру і дабрабыту.
Варта адзначыць, што ў арганізацыях Беларускай чыгункі ў 2023 годзе ад укаранення рацыяналізатарскіх прапаноў атрыманы эканамічны эфект у памеры 3,6 млн рублёў.
За 11 месяцаў 2024 года пры ўкараненні 464 рацпрапаноў, у распрацоўцы якіх прыняло ўдзел 460 наватараў БЧ, эканамічны эфект ужо склаў 4,8 млн рублёў.
Усе распрацоўкі былі накіраваны на забеспячэнне бяспекі руху, эканомію і рацыянальнае выкарыстанне працоўных, паліўна-энергетычных і матэрыяльных рэсурсаў, удасканаленне працэсаў рамонту і эксплуатацыі цягавага рухомага саставу, паляпшэнне ўмоў працы і інш.
Лепшыя вынікі рацыяналізатарскай дзейнасці за 11 месяцаў 2024 года прадэманстравалі работнікі Баранавіцкага аддзялення Беларускай чыгункі – 76 рацпрапаноў з эканамічным эфектам больш за 2 млн рублёў.
У ліку лідараў таксама Гомельскае аддзяленне магістралі. Тут было ўкаранёна 53 рацпрапановы з эканамічным эфектам больш за 820 тыс. рублёў. У тройцы лепшых і Мінскае аддзяленне БЧ – 21 рацпрапановы, эканамічны эфект парадку 810 тыс. рублёў.
Найбольш актыўна праца з рацыяналізатарскімі прапановамі праводзіцца службамі лакаматыўнай і вагоннай гаспадарак, пасажырскай, электрыфікацыі і электразабеспячэння.
Развіццю інтэлектуальных і творчых здольнасцяў моладзі, выяўленню і ўкараненню на беларускай магістралі інавацыйных ідэй і праектаў, якія ўяўляюць практычную цікавасць, спрыяе таксама правядзенне конкурсу маладзёжных ініцыятыў. У гэтым годзе ён прайшоў сёмы раз. У інтэлектуальным спаборніцтве прымалі ўдзел спецыялісты ва ўзросце да 31 года.
У 2024 годзе (па выніках 2023 года) на конкурс маладзёжных ініцыятыў было прадстаўлена 98 работ у 8 намінацыях. Самымі актыўнымі яго ўдзельнікамі сталі работнікі Гомельскага, Мінскага і Баранавіцкага аддзяленняў. Ад адасобленых структурных падраздзяленняў (філіялаў) свае работы прадставіў Канструктарска-тэхнічны цэнтр БЧ, Цэнтр дыягностыкі аб'ектаў інфраструктуры, а таксама Галоўны разліковы інфармацыйны цэнтр Беларускай чыгункі.
Наватарскія ідэі маладых чыгуначнікаў уносяць важкі ўклад ва ўдасканаленне вытворчых аперацый, аптымізацыю тэхналагічных працэсаў рамонту і эксплуатацыі цягавага рухомага саставу. Яны накіраваны на забеспячэнне бяспекі руху цягнікоў, эканомію і рацыянальнае выкарыстанне працоўных, паліўна-энергетычных і матэрыяльных рэсурсаў, паляпшэнне ўмоў працы работнікаў Беларускай чыгункі.
Інфармацыя падрыхтавана прэс-цэнтрам БЧ
