Ва Упраўленні Беларускай чыгункі 27 лістапада 2024 года абмеркавалі пытанні забеспячэння бяспекі транспартнай дзейнасці на чыгуначных пераездах і чыгуначных пешаходных пераходах

29 лістапада 2024

27 лістапада 2024 года ва Упраўленні Беларускай чыгункі адбылася сумесная нарада прадстаўнікоў беларускай магістралі і органаў унутраных спраў па пытаннях забеспячэння бяспекі транспартнай дзейнасці на чыгуначных пераездах і чыгуначных пешаходных пераходах. Мерапрыемства прайшло ў фармаце круглага стала пад старшынствам намесніка Начальніка Беларускай чыгункі Ігара Казлоўскага. У ім прынялі ўдзел старшы пракурор упраўлення Генеральнай пракуратуры Рэспублікі Беларусь па наглядзе за выкананнем заканадаўства на транспарце і ў мытных органах Дзмітрый Яфімаў, прадстаўнікі Дзяржаўнай аўтамабільнай інспекцыі Міністэрства ўнутраных спраў, СЗАТ «Бяспечныя дарогі Беларусі», а таксама кіраўнікі і спецыялісты профільных службаў Упраўлення Беларускай чыгункі.

Адкрываючы нараду, намеснік Начальніка Беларускай чыгункі Ігар Казлоўскі адзначыў важнасць тэмы, якая абмяркоўваецца. Ён падкрэсліў, што, нягледзячы на меры, якія прымаюцца, праблема траўміравання грамадзян на аб'ектах чыгуначнага транспарту, а таксама дарожна-транспартных здарэнняў на чыгуначных пераездах застаецца актуальнай. Неабходны новыя падыходы для павышэння эфектыўнасці прафілактычнай работы, удасканаленне заканадаўчай базы і забеспячэнне сістэмнага кантролю.

Выступаючы перад прысутнымі, першы намеснік начальніка службы пуці Упраўлення Беларускай чыгункі Сяргей Корык падкрэсліў, што з 2020 года адбылося 52 ДТЗ на чыгуначных пераездах, у выніку якіх смяротна траўміравана 6 чалавек, 20 пацярпела. Толькі за 10 месяцаў 2024 года зафіксавана 10 дарожна-транспартных здарэнняў, у якіх 4 чалавекі загінула, 6 – траўміравана.

Як паказваюць праверкі, асноўнымі прычынамі аварый з'яўляюцца невыкананне кіроўцамі правілаў дарожнага руху, няспраўнасць тармазной сістэмы і знаходжанне кіроўцаў у стане алкагольнага ап'янення.

З мэтай скарачэння колькасці ДТЗ на чыгуначных пераездах, павышэння бяспекі руху аўтамабільнага і чыгуначнага транспарту Беларускай чыгункай з супрацоўнікамі праваахоўных органаў сістэмна праводзяцца сумесныя рэйды на станцыях, прыпыначных пунктах і чыгуначных перагонах, ажыццяўляецца дадатковае абследаванне тэхнічнага стану пешаходных насцілаў, чыгуначных пераездаў, сродкаў інфармавання аб набліжэнні цягнікоў.

Асаблівая ўвага надаецца інфармацыйна-растлумачальнай рабоце ў працоўных калектывах, установах адукацыі, а таксама ў галіновых і рэспубліканскіх сродках масавай інфармацыі. Прапрацоўваецца пытанне па вызначэнні першачарговых месцаў, якія падлягаюць абсталяванню сродкамі фотавідэафіксацыі і іншых тэхнічных рашэнняў.

Прысутны на мерапрыемстве галоўны інжынер СЗАТ «Бяспечныя дарогі Беларусі» Віталь Лісоўскі адзначыў гатоўнасць прадпрыемства ажыццяўляць супрацоўніцтва з беларускай магістраллю ў пытаннях забеспячэння сістэмамі фота- і відэакантролю.

У ходзе абмеркавання парадку дня, начальнік упраўлення грамадскай бяспекі на аб'ектах транспарту МУС РБ Генадзь Ворса акцэнтаваў увагу на неабходнасці ўзмацнення жорсткасці адказнасці за парушэнне правілаў перасячэння пешаходных пераходаў.

У сваю чаргу старшы пракурор упраўлення Генеральнай пракуратуры Рэспублікі Беларусь па наглядзе за выкананнем заканадаўства на транспарце і ў мытных органах Дзмітрый Яфімаў заклікаў больш эфектыўна выкарыстоўваць магчымасці дзеючай нарматыўнай базы.

Інфармацыя падрыхтавана прэс-цэнтрам БЧ