Напярэдадні Дня чыгуначніка на Беларускай чыгунцы ўзнагародзілі пераможцаў конкурсу малюнка сярод дзяцей работнікаў магістралі

02 жніўня 2024

Напярэдадні прафесійнага свята ў Мінскім Палацы культуры і спорту чыгуначнікаў адбылася ўрачыстая цырымонія ўзнагароджання пераможцаў конкурсу малюнка сярод дзяцей работнікаў Беларускай чыгункі, прысвечанага 80-й гадавіне вызвалення Рэспублікі Беларусь ад нямецка-фашысцкіх захопнікаў.

Дыпломамі і каштоўнымі падарункамі рабят узнагародзілі старшыня Аб'яднанай галіновай прафсаюзнай арганізацыі чыгуначнікаў і транспартных будаўнікоў Ігар Камароўскі і начальнік аддзела ідэалогіі і сацыяльна-культурнай работы Упраўлення Беларускай чыгункі Андрэй Баравы.

Віншуючы аўтараў малюнкаў, Ігар Сяргеевіч адзначыў высокі ўзровень усіх работ і глыбокае разуменне тэматыкі конкурсу. Відаць, што рабяты ведаюць і любяць гісторыю сваёй краіны. У сваю чаргу Андрэй Паўлавіч пажадаў юным талентам творчых поспехаў, натхнення і нагадаў, што менавіта іх таленавітымі рукамі будзе будавацца будучыня Беларусі.

Конкурс праходзіў з 6 мая па 28 чэрвеня 2024 года. У творчым спаборніцтве ўдзельнічалі рабяты ў чатырох узроставых катэгорыях: 5–7 гадоў, 8–11 гадоў, 12–14 гадоў, 15–17 гадоў. Усяго на конкурс паступіла каля 300 работ. Малюнкі адлюстроўваюць працоўны і ратны подзвіг чыгуначнікаў у гады Вялікай Айчыннай вайны, а таксама ролю работнікаў магістралі ў аднаўленні краіны ў пасляваенныя гады, удзел чыгуначнікаў-ветэранаў ва ўрачыстых мерапрыемствах, прысвечаных святкаванню Дня Перамогі і Дня вызвалення Рэспублікі Беларусь ад нямецка-фашысцкіх захопнікаў.

Усе прызёры і іх бацькі таксама былі запрошаны на ўрачысты сход і святочны канцэрт, прысвечаныя Дню чыгуначніка.

У мэтах падтрымкі дзяцей і дэманстрацыі іх талентаў выстава работ пераможцаў і ўдзельнікаў конкурсу дзіцячага малюнка размешчана ў фае Мінскага Палаца культуры і спорту чыгуначнікаў. Дадзеная экспазіцыя стане перасоўнай і будзе дэманстравацца ў арганізацыях Беларускай чыгункі.

Інфармацыя падрыхтавана прэс-цэнтрам БЧ