На Беларускай чыгунцы працягваецца конкурс на лепшы дзіцячы малюнак, прысвечаны 80-годдзю вызвалення Беларусі ад нямецка-фашысцкіх захопнікаў

17 чэрвеня 2024

Конкурс сярод дзяцей чыгуначнікаў на лепшы малюнак, прысвечаны 80-годдзю вызвалення Рэспублікі Беларусь ад нямецка-фашысцкіх захопнікаў працягваецца на БЧ. У творчым спаборніцтве могуць прыняць удзел дзеці ва ўзроставых катэгорыях: 5-7 гадоў, 8-11 гадоў, 12-14 гадоў і 15-17 гадоў. У кожнай з іх будзе прысуджацца 1, 2 і 3 месца.

Малюнкі можна даслаць не пазней за 28 чэрвеня 2024 года ў рэдакцыю газеты «Чыгуначнік Беларусі» па адрасе: г. Мінск, вул. Кірава, 2 з пазнакай «Конкурс» і пазначэннем узроставай катэгорыі.

Журы будзе ацэньваць толькі адну работу ад аднаго дзіцяці на лісце паперы фармату А3, выкананую простым або каляровымі алоўкамі, акварэллю, гуашшу. Малюнак павінен адлюстроўваць працоўны і ратны подзвіг чыгуначнікаў у гады Вялікай Айчыннай вайны, а таксама ролю работнікаў магістралі ў аднаўленні краіны ў пасляваенныя гады, удзел чыгуначнікаў-ветэранаў ва ўрачыстых мерапрыемствах, прысвечаных святкаванню Дня Перамогі і Дня вызвалення Рэспублікі Беларусь ад нямецка-фашысцкіх захопнікаў.

Вынікі конкурсу і лепшыя работы будуць апублікаваны ў газеце «Чыгуначнік Беларусі», на афіцыйным інтэрнэт-сайце беларускай магістралі і ў яе афіцыйных акаўнтах у сацыяльных сетках.

Інфармацыя падрыхтавана прэс-цэнтрам БЧ