Прадстаўнікі Беларускай чыгункі наведалі месца раскопак масавага пахавання ахвяр генацыду ва ўрочышчы Уручча

31 мая 2024

30 мая 2024 года работнікі Мінскага аддзялення Беларускай чыгункі наведалі месца раскопак масавага пахавання ахвяр генацыду ў лясным масіве, што знаходзіцца ва ўрочышчы Уручча.

Чыгуначнікі азнаёміліся з копіямі дакументаў, фатаграфіямі і картамі, а таксама наведалі ямы-магілы, дзе былі выяўлены астанкі забітых мірных жыхароў і ваеннапалонных, прадметы побыту.

Намеснік начальніка ўпраўлення па наглядзе за расследаваннем асабліва важных крымінальных спраў Генеральнай пракуратуры – намеснік кіраўніка следчай групы па крымінальнай справе аб генацыдзе беларускага народа Сяргей Шыкунец падрабязна расказаў работнікам БЧ аб прычынах узбуджэння ў 2021 годзе крымінальнай справы аб генацыдзе беларускага народа ў гады Вялікай Айчыннай вайны, пошукавых работах і следчых мерапрыемствах, якія правадзіліся. Паводле папярэдніх дадзеных, маштаб трагедыі 80-гадовай даўнасці нашмат большы, чым меркавалася раней.

У архіўных дакументах было згадванне аб наяўнасці ва ўрочышчы Уручча парадку 10 масавых магіл, у якіх, паводле ацэнак экспертаў, былі пахаваны больш за 50 тысяч чалавек. Аднак пошукавыя работы апошніх гадоў паказваюць на тое, што ў гэтай мясцовасці можа быць каля 20 такіх ям, дзе могуць знаходзіцца астанкі да 100 тысяч чалавек.

Следчая група працягвае важную і адказную работу ва ўрочышчы Уручча. Выкрываюць новыя факты генацыду і ў іншых рэгіёнах Беларусі. Такое расследаванне, як лічаць яго ініцыятары, дазволіць па-новаму ацаніць маштаб трагедыі перыяду Вялікай Айчыннай вайны, расказаць праўду пра зверствы нямецка-фашысцкіх захопнікаў на тэрыторыі нашай краіны і захаваць пра гэта гістарычную памяць.

Інфармацыя падрыхтавана прэс-цэнтрам БЧ