Адбылася рабочая сустрэча кіраўніцтва Беларускай чыгункі з кампаніямі-рэзідэнтамі Кітайска-Беларускага індустрыяльнага парку «Вялікі камень»

23 лютага 2023

21 лютага 2023 года прайшла рабочая сустрэча першага намесніка Начальніка Беларускай чыгункі Пятра Дулуба з кіраўнікамі кампаній-рэзідэнтаў Кітайска-Беларускага індустрыяльнага парку «Вялікі камень» па пытаннях дастаўкі грузаў кантэйнернымі цягнікамі з Кітая ў Беларусь і назад з выкарыстаннем перагрузачных магутнасцяў Беларускай чыгункі. Мерапрыемства было арганізавана па ініцыятыве Пасольства Кітайскай Народнай Рэспублікі ў Рэспубліцы Беларусь.

Супрацоўнікі пасольства КНР у Беларусі і кіраўнікі асноўных вытворчых кампаній – рэзідэнтаў Кітайска-Беларускага індустрыяльнага парку «Вялікі камень» наведалі кантэйнерны тэрмінал «Калядзічы» дзяржаўнага прадпрыемства «БТЛЦ» Беларускай чыгункі. Ім была прадстаўлена тэхналогія работы тэрмінала, тэхнічныя магчымасці па апрацоўцы кантэйнерных грузаў, прыёме і адпраўцы кантэйнерных цягнікоў. У цяперашні час дзяржаўнае прадпрыемства «БТЛЦ» мае неабходныя магутнасці па перапрацоўцы кантэйнерных грузаў, работа ажыццяўляецца пры строгім захаванні тэхналогіі працэсаў арганізацыі перавозак.

У ходзе сустрэчы бакі абмеркавалі бягучыя ўмовы і далейшыя перспектывы супрацоўніцтва, у тым ліку была акцэнтавана ўвага на неабходнасці больш цеснага практычнага ўзаемадзеяння ва ўмовах павелічэння аб'ёмаў вырабленай прадукцыі і росту аб'ёмаў перавозак грузаў кампаній – рэзідэнтаў Кітайска-Беларускага індустрыяльнага парку «Вялікі камень».

Інфармацыя падрыхтавана прэс-цэнтрам БЧ