«Дырыжор руху» – на Беларускай чыгунцы адбыўся конкурс сярод работнікаў, якія забяспечваюць арганізацыю руху цягнікоў

21 мая 2021

Фінал чыгуначнага конкурсу «Дырыжор руху» прайшоў 20 мая на сцэне Культурна-спартыўнага цэнтра Мінскага аддзялення. У конкурсе прынялі ўдзел шэсць дзяжурных па станцыі. Папярэдне кожны з іх атрымаў перамогу ў адборачных турах на сваіх аддзяленнях чыгункі.

На працягу трох этапаў чыгуначнага конкурсу ўдзельнікам трэба было раскрыць перад журы і гледачамі прафесійныя якасці і творчыя таленты. На этапе «Я – дзяжурны па станцыі» ўдзельнікі прадставілі відэаролікі пра сябе і сваю работу дзяжурным па станцыі. На этапе «Мая работа» ім трэба было адказаць на пытанні, непасрэдна звязаныя з прафесійнай дзейнасцю дзяжурнага па станцыі. Удзельнікі выцягвалі білеты з заданнямі, у кожным з якіх было па два пытанні, як з варыянтамі адказу, так і тыя, якія патрабуюць дакладнага ведання правілаў тэхнічнай эксплуатацыі. Як адзначыла журы, прадстаўнікі кіраўніцтва службы перавозак БЧ, з большасцю апісаных сітуацый удзельнікі конкурсу рэгулярна сустракаюцца падчас штодзённай рабочай дзейнасці.

Яркім фіналам конкурсу стаў этап «Музычная феерыя». Удзельнікі выступілі з разнастайнымі творчымі нумарамі. Класічны венскі вальс змяняла тэатралізаванае прадстаўленне на сінтэзе жанраў, а вакальныя прызнанні ў любові да малой радзіме адцянілі кавер-версія папулярнай рэп-балады і запальная песня «Ах, мамачка ...» з кінафільма «Рускае поле» 1971 года.

Пераможцам конкурсу «Дырыжор руху» стаў Максім Аксянюк, дзяжурны па станцыі Мінск-Сартавальны, другое месца заняла Ганна Старчанка, дзяжурны па станцыі Зябраўка Гомельскага аддзялення, а трэцяе месца заняла Вольга Фальковіч, дзяжурны па станцыі Лунінец Баранавіцкага аддзялення чыгункі. Дарэчы, толькі 0,1 бала ёй уступіла Алена Вазнюк, дзяжурны па станцыі Магілёў-2. Ёй, а таксама Лізавеце Галкінай, дзяжурнай па станцыі Шуміліна Віцебскага аддзялення і Уладзіславу Зычкову, дзяжурнаму па станцыі Дубіца Брэсцкага аддзялення ўручылі дыпломы ўдзельнікаў. Таксама пераможцам і ўдзельнікам уручылі сертыфікаты на куплю бытавой тэхнікі ад Беларускай чыгункі і Аб'яднанай галіновай прафсаюзнай арганізацыі чыгуначнікаў і транспартных будаўнікоў, а таксама букеты кветак.

Мэтай правядзення конкурсу «Дырыжор руху» з'яўляецца павышэнне прэстыжу прафесій чыгуначнага транспарту, выхаванне працоўнай дысцыпліны, адказнасці і адданасці сваёй справе і ўпэўненасці ў дасягненні высокіх вынікаў у працы, удасканаленне прафесійнага майстэрства дзяжурных па чыгуначных станцыях, абмен станоўчым вопытам, а таксама раскрыццё творчага патэнцыялу чыгуначнікаў . Беларуская чыгунка арганізуе яго сумесна з Аб'яднанай галіновай прафсаюзнай арганізацыяй чыгуначнікаў і транспартных будаўнікоў. У 2021 годзе конкурс адбыўся ў рамках мерапрыемстваў, прымеркаваных да Года народнага адзінства і 150-годдзю чыгуначных зносін Масква-Брэст.

Інфармацыя падрыхтавана прэс-цэнтрам БЧ