Беларуская чыгунка прыме ўдзел у Міжнародным форуме супрацоўніцтва ў сферы лагістыкі «Адзін пояс — адзін шлях» у Шанхаі (КНР)

05 лістапада 2018

Форум, прысвечаны абмеркаванню магчымасцяў для рэалізацыі сумесных праектаў у сферы транспарту і лагістыкі ў рамках канцэпцыі «Адзін пояс — адзін шлях», адбудзецца ў Шанхаі 6 лістапада. Арганізатарамі выступаюць карпарацыя «Чайна Мерчантс Груп» (КНР) і АТ «Порт Дуйсбург» (Германія). Мерапрыемства пройдзе ў рамках першай Кітайскай міжнароднай выставы імпартных тавараў і паслуг. Дэлегацыю Беларускай чыгункі ўзначаліць Начальнік БЧ Уладзімір Марозаў, які выступіць на форуме з дакладам на тэму «Пра перспектывы развіцця транспартна-лагістычнага патэнцыялу Беларускай чыгункі з улікам канцэпцыі «Адзін пояс — адзін шлях».

Таксама праграмай візіту дэлегацыі БЧ у Кітайскую Народную Рэспубліку запланавана рабочая сустрэча Начальніка Беларускай чыгункі Уладзіміра Марозава з Генеральным дырэктарам карпарацыі «Кітайскія чыгункі» спадаром Лу Дунфу. Бакі абмяркуюць пытанні развіцця двухбаковага супрацоўніцтва ў транспартна-лагістычнай сферы, а таксама ўзгаднення далейшых дзеянняў у рамках Пагаднення паміж чыгункамі Кітая, Беларусі, Германіі, Казахстана, Манголіі, Польшчы і Расіі аб паглыбленні супрацоўніцтва па арганізацыі кантэйнерных цягнікоў у зносінах Кітай—Еўропа, падпісанага 20 красавіка 2017 года ў горадзе Мінску.

Акрамя таго, прадстаўнікі БЧ прымуць удзел у Беларуска-Кітайскім дзелавым форуме, які адбудзецца ў Шанхаі 7 лістапада.

У 2018 годзе дзякуючы прадпрымаемым Беларускай чыгункай і АТ «Польскія дзяржаўныя чыгункі» мерам забяспечваецца бесперабойны пропуск кантэйнерапатока праз беларуска-польскія памежныя пераходы Брэст—Цярэспаль, Брузгі-Кузніца Беластоцкая і Свіслач—Семянуўка ў зносінах Кітай—Еўропа—Кітай, прапускная здольнасць якіх сёння складае 50 пар грузавых цягнікоў у суткі, і ёсць рэзерв больш за 40%.

За 9 месяцаў 2018 года праз Беларусь ужо прайшло 2373 кантэйнерных цягнікі з 50 гарадоў Кітая ў напрамку 40 гарадоў 15 еўрапейскіх краін, а таксама ў адваротным напрамку. У іх складзе перавезена 213,4 тыс. кантэйнераў, што на 25% больш, чым у 2017 годзе. Да канца гэтага года плануецца, што аб'ём перавозак складзе не менш за 340 тыс. кантэйнераў.

У рамках развіцця экспарту беларускай прадукцыі ў Кітай у 2017 годзе па маршруце Смаргонь—Чэнду быў адпраўлены першы паўнасастаўны кантэйнерны цягнік з прадукцыяй дрэваапрацоўчай прамысловасці прадпрыемства «Кронаспан». У верасні 2018 года адбылася адпраўка першага экспартнага кантэйнернага цягніка з малочнай прадукцыяй беларускіх прадпрыемстваў па маршруце Мінск—Чунцын.

У цэлым, сёння актыўна рэалізуюцца праекты кантэйнерных цягнікоў у Кітай з беларускімі прадуктамі харчавання, ляснымі грузамі, паперай і інш. Іх развіццю спрыяюць, у тым ліку і комплексныя стаўкі па дастаўцы кантэйнераў, прапанаваныя Беларускай чыгункай, прызначэннем ў Чунцын, Сіань, Чжэнчжоў у прамых чыгуначных зносінах, уключаючы аўтадастаўку з названых гарадоў у любую кропку Кітая. Час у шляху ад станцыі адпраўлення да станцыі прызначэння складае 12—14 сутак.

Інфармацыя падрыхтавана прэс-цэнтрам БЧ