Вы выкарыстоўваеце састарэлы браўзэр. Каб карыстацца ўсімі магчымасцямі сайта, загрузіце і ўсталюйце адзін з гэтых браўзэраў:

БЕЛ
ENG

У Год гасціннасці Беларуская чыгунка забяспечыць максімум выгод і камфорту для пасажыраў

20 сакавіка 2014

Беларуская чыгунка працягвае актыўную работу па падрыхтоўцы аб'ектаў чыгуначнай інфраструктуры і арганізацыі на высокім узроўні прыёму гасцей, якія прыбудуць на мерапрыемствы чэмпіянату свету па хакеі, святкаванне 70-й гадавіны вызвалення Рэспублікі Беларусь ад нямецка-фашысцкіх захопнікаў, іншыя міжнародныя акцыі.

Галоўнай падзеяй у рамках Года гасціннасці будзе 78-ы чэмпіянат свету па хакеі з шайбай, які пройдзе ў сталіцы Беларусі з 9 па 25 мая на дзвюх пляцоўках — «Мінск-Арэна» і «Чыжоўка-Арэна» .

Усю работу Беларуская чыгунка ажыццяўляе ў межах комплексных мерапрыемстваў, накіраваных на забеспячэнне транспартнага абслугоўвання гасцей і ўдзельнікаў чэмпіянату свету, правядзенне работ па рамонце, рэканструкцыі і мадэрнізацыі асобных аб'ектаў транспартнай інфраструктуры, арганізацыйных мерапрыемстваў, якія прадугледжваюць як удасканаленне інфармацыйнага забеспячэння, так і падрыхтоўку абслугоўваючага персаналу.

 

Геаграфія міжнародных чыгуначных перавозак гасцей і ўдзельнікаў чэмпіянату вельмі шырокая. Прыезд гасцей у Беларусь чакаецца з Расіі, Латвіі, Германіі, Польшчы, Славакіі, Фінляндыі, Чэхіі, Вялікабрытаніі, Літвы, Швейцарыі, Украіны, ЗША, Іспаніі, Канады, Швецыі, Францыі, Нарвегіі, Італіі, Эстоніі, Ірландыі, Ізраіля, Аўстрыі, Бельгіі, Нідэрландаў, Даніі, Казахстана, Аб'яднаных Арабскіх Эміратаў, Венгрыі. Найбольшая колькасць балельшчыкаў, якія прыбываюць чыгуначным транспартам, чакаецца з Расійскай Федэрацыі, Латвіі, Германіі, Польшчы, Славакіі. Асноўнымі маршрутамі прыбыцця стануць Мінск—Масква, Мінск—С.-Пецярбург, Мінск—Яраслаўль, Минск—Чалябiнск/Самара, Мінск—Рыга, Мінск—Вільнюс, Мінск—Варшава, Мінск—Кіеў, Мiнск—Прага, Мінск—Берлін—Парыж, Мінск—Вена—Ніца. Таксама прадугледжана магчымасць арганізацыі праезду узгодненымі цягнікамі з перасадкай на станцыі Цярэспаль і Брэст. Сумесна з органамі пагранічнага і мытнага кантролю ўзгоднена тэхналогія па правядзенні кантролю цягнікоў, якія ідуць па шырокай каляіне без перастаноўкі да станцыі Цярэспаль для арганізацыі перасадачных зносін па названай станцыі.

Праезд пасажыраў ўнутры рэспублікі будзе ажыццяўляцца цягнікамі міжрэгіянальных ліній паміж сталіцай і абласнымі цэнтрамі згодна з дзеючым графікам. Акрамя таго, Беларуская чыгунка па заяўках арганізацый гатова прызначыць дадатковыя цягнікі .

Дабрацца да спартыўных аб'ектаў «Мінск-Арэна» (п.п. Масюкоўшчына) і «Чыжоўка-Арэна» (п.п. Лошыца) Беларуская чыгунка прапануе цягнікамі гарадскіх ліній. Рух цягнікоў гарадскіх ліній прадугледжаны з улікам увязкі з пачаткам і заканчэннем матчаў, нераўнамернасці правядзення спаборніцтваў па днях тыдня і на працягу сутак (пяць перыядаў правядзення матчаў). Графік распрацаваны і ўзгоднены з ДУ «Сталічны транспарт і сувязь», «Дырэкцыяй чэмпіянату свету па хакеі з шайбай 2014». На перыяд правядзення матчаў чэмпіянату Беларуская чыгунка распрацавала 5 перыядаў руху гарадскіх ліній, у рамках якіх з 9 па 25 мая будуць курсіраваць дадатковыя цягнікі. Інтэрвал руху цягнікоў гарадскіх ліній складзе 10—15 хвілін, па 3 пары да пачатку кожнага матчу і пасля іх заканчэння. Ва ўсіх вагонах цягнікоў гарадскіх ліній размесцяцца расклад гульняў чэмпіянату.

Беларуская чыгунка прапануе розныя варыянты набыцця білетаў на цягнікі гарадскіх ліній. Білет можна набыць у чыгуначных касах, праз плацежна-даведачныя тэрміналы самаабслугоўвання. На вакзале станцыі Мінск-Пасажырскі ўстаноўлена 9 тэрміналаў самаабслугоўвання для рэалізацыі праязных дакументаў на цягнікі рэгіянальных ліній эканом-класа і гарадскіх ліній па банкаўскіх плацежных картках. У тым ліку тэрміналы ўстаноўлены на вуліцы каля будынку вакзала пад інфармацыйным табло, размешчаным побач з 22—24 пуцямі. Таксама білет можна купіць у цягніку.

У мэтах павышэння якасці абслугоўвання пасажыраў Беларуская чыгунка актыўна праводзіць работу па абнаўленні вакзальных комплексаў. Уведзена ў эксплуатацыю зала чакання станцыі Мінск-Пасажырскі. Новае аблічча прынялі вакзалы станцыі Гродна, завяршаюцца работы на станцыі Брэст-Цэнтральны. Завершаны работы па рэканструкцыі прыпыначнага пункта Лошыца.

Асаблівая ўвага надаецца інфармацыйнаму забеспячэнню для гасцей і ўдзельнікаў чэмпіянату свету па хакеі. Ужо сёння на чыгуначных вакзалах ў Гродне, Брэсце і Мінску, інфармацыя, звязаная з прыбыццём і адпраўленнем цягнікоў міжнародных зносін, агучваецца на англійскай, беларускай і рускай мовах. Падчас правядзення чэмпіянату будзе агучвацца і для гарадскіх ліній. Для зручнасці гасцей на вакзалах станцый Брэст-Цэнтральны, Гродна, Мінск-Пасажырскі і прыпыначных пунктах Масюкоўшчына, Лошыца ​​размешчаны элементы прасторавай навігацыі-інфармацыйныя ўказальнікі, піктаграмы. У залах чакання на вакзалах станцый Брэст-Цэнтральны і Мінск-Пасажырскі ўстаноўлены сучасныя табло візуальнай інфармацыі з падачай звестак на рускай і англійскай мовах, абсталююць адмысловыя інфармацыйныя стэнды з карыснай інфармацыяй для замежных гасцей.

Інфармацыя аб правядзенні чэмпіянату свету па хакеі ў Беларусі знойдзе адлюстраванне і ў стылістычным афармленні. Да прыкладу, на рускай і англійскай мовах беларуская магістраль аформіць у адзіным стылі інфармацыю ўнутры салонаў цягнікоў: правілы праезду, пералік прадукцыі для рэалізацыі, размяшчэнне інфармацыйных цэнтраў на вакзале станцыі Мінск-Пасажырскі, меню вагонаў-рэстаранаў. Варта адзначыць, што ў вагонах-рэстаранах прадугледжана меню еўрапейскай і нацыянальнай кухні.

На чыгуначных вакзалах станцый Мінск-Пасажырскі, Брэст-Цэнтральны акрамя існуючых міжнародных кас вызначаны спецыялізаваныя касы па продажы білетаў замежным грамадзянам. У будынку вакзала станцыі Мінск-Пасажырскі на перыяд правядзення чэмпіянату адкрыецца каса № 14, на станцыі Брэст-Цэнтральны — каса № 12. Акрамя таго, продаж білетаў замежным грамадзянам на станцыі Мінск-Пасажырскі прадугледжаныў касах, размешчаных па адрасах: вул. Кірава, 2 і вул. Бабруйская, 4 .

Міжнародныя касы таксама будуць аформлены ў адзіным стылі з выкарыстаннем сімволікі чэмпіянату.

Для персаналу, занятага абслугоўваннем пасажыраў у цягніках і на вакзалах, выдадзены спецыялізаваныя англамоўныя размоўнікі. Акрамя таго работнікі станцый Мінск-Пасажырскі і Брэст-Цэнтральны прайшлі навучанне на курсах англiйскай мовы .

Таксама для арганізацыі абслугоўвання замежных гасцей і ўдзельнікаў чэмпіянату свету, забеспячэння неабходнай дапамогі і даведачных паслуг на Брэсцкім і Мінскім вакзалах, п. п. Масюкоўшчына і Лошыца ​​Беларуская чыгунка стварыла інфармацыйныя групы. У іх склад увайшлі прадстаўнікі пярвічных арганізацый ГА «БРСМ» Мінскага і Брэсцкага аддзяленняў Беларускай чыгункі. Гэта маладыя і камунікабельныя рабяты да 30 гадоў. Акрамя таго, будуць створаны спецыяльныя падраздзяленні з удзелам валанцёраў. На станцыі Мінск-Пасажырскі ў месцах асноўных пасажырапатокаў будуць працаваць 4 інфармацыйныя цэнтры. Галоўны інфармацыйны цэнтр размесціцца ў зале чакання канкорсу, дзе будуць працаваць спецыялісты «Мiнгардаведка» і турыстычнага цэнтра «Дартур» Мінскага аддзялення Беларускай чыгункі.

Работнікі інфармацыйных цэнтраў акажуць інфармацыйную падтрымку гасцям чэмпіянату, растлумачаць, як прайсці да аб'ектаў абслугоўвання пасажыраў на вакзале, да месцаў пражывання і спартыўных арэнах, акажуць садзейнічанне ў карыстанні транспартнымі паслугамі, выкліку таксі або насільшчыка .

Турыстычны цэнтр «Дартур» арганізуе экскурсійнае абслугоўванне грамадзян, акажа садзейнічанне па пошуку месцаў у гасцініцах, хостэлах, ажыццявіць іх браніраванне, закажа месцы ў рэстаранах. Для тых, хто хоча пазнаёміцца ​​з нашай сталіцай бліжэй , — прапануе штодзённыя аўтобусныя экскурсіі «Мінск — сталіца Рэспублікі Беларусь». Экскурсіі будуць арганізоўвацца ад чыгуначнага вакзалу. Пачатак рускамоўных экскурсій у 10:00, 14:00, 17:00. На англійскай мове — у 12:00.

Беларуская чыгунка на вакзалах станцый Мінск-Пасажырскі і Брэст-Цэнтральны арганізуе работу кругласутачных Каардынацыйных цэнтраў. У іх будзе сканцэнтравана работа ўсіх падраздзяленняў, звязаных з забеспячэннем транспартнага абслугоўвання гасцей і ўдзельнікаў чэмпіянату свету па хакеі, а пры неабходнасці і ўрэгуляваннем нестандартных сітуацый, што мугуць ўзнікнуць. На станцыі Мінск-Пасажырскі Цэнтр размесціцца на першым паверсе вакзала. Тут будзе арганізавана кругласутачнае дзяжурства работнікаў пасажырскай службы Ўпраўлення Беларускай чыгункі і Мінскага аддзялення чыгункі. Каардынацыйны цэнтр будзе ажыццяўляць аператыўнае ўзаемадзеянне з усімі падраздзяленнямі вакзала станцыі Мінск-Пасажырскі, начальнікамі цягнікоў фарміравання Беларускай чыгункі, а таксама сувязь з Каардынацыйным цэнтрам у Брэсце і аналагічнымі структурамі ў іншых транспартных арганізацыях, аргкамітэтам чэмпіянату свету па хакеі ў г. Мінску, турыстычнай кампаніяй «ЦэнтрКурорт».

На вакзале станцыі Мінск-Пасажырскі свае паслугі гасцям прапануе зала павышанай камфортнасці «Клуб СВ». Ён размешчаны на другім паверсе вакзала і ў першую чаргу служыць для пасажыраў, якія набылі білет у вагон СВ. Трохгадзіннае наведванне клуба і кубак кавы бясплатна. Наведвальнікі клуба змогуць не толькі прыемна правесці час да паездкі або адпачыць пасля яе, а таксама атрымаць шырокі спектр паслуг. Адміністратары клуба валодаюць англійскай мовай.

Асаблівая ўвага ў «Клубе СВ» надаецца арганізацыі бізнес-паслуг. Пасажыры змогуць бесправаднога падлучэння да сеткі Інтэрнэт, пры неабходнасці забраніруюць чыгуначныя квіткі, гасцініцу, дапамогуць набыць білеты ў тэатр ці на канцэрт. Таксама выклічуць таксі, насільшчыка, пазнаёмяць з турыстычнымі праграмамі ў Мінску і іншых беларускіх гарадах. Гэтыя і многія іншыя паслугі адміністратары «Клуба СВ» акажуць наведвальнікам бясплатна. Зала павышанай камфортнасці разлічана на 40 чалавек.

У якасці дадатковага інфармавання замежных гасцей і для зручнасці карыстальнікаў Беларуская чыгунка ўкараніла англамоўную версію карпаратыўнага сайта www.rw.by/en .

На англійскай мове даступныя такія раздзелы сайта, як «Паслугі пасажырам» (Passenger Services), «Грузавыя перавозкім» (Freight), «Карпаратыўны» (Corporate), а таксама «Расклад цягнікоў гарадскіх ліній і рэгіянальных ліній эканом-класа» (Timetable) .

Адным з важных складнікаў тэхналогіі абслугоўвання ўдзельнікаў і гасцей чэмпіянату свету па хакеі 2014 года ў г. Мінску з'яўляецца забеспячэнне на аб'ектах чыгуначнага транспарту правапарадку і грамадскай бяспекі.

На чыгуначных вакзалах станцый Мінск-Пасажырскі, Брэст-Цэнтральны, участку п. п.Масюкоўшчына—ст.Минск-Пасажырскі—о.п.Лошыца ​​Беларуская чыгунка гэтую работу будзе ажыццяўляць у цесным узаемадзеянні з органамі ўнутраных спраў на транспарце і ГУУС Мінгарвыканкама.

 

Інфармацыя падрыхтавана прэс-цэнтрам БЧ

Да спісу навін за 2014 год