Беларуская чыгунка прызначыла дадатковыя цягнікі ў зносінах Віцебск-Масква і Мінск-Віцебск на час правядзення фестывалю «Славянскі базар у Віцебску» у 2023 годзе

18 мая 2023

Беларуская чыгунка на час правядзення XXXII Міжнароднага фестывалю мастацтваў «Славянскі базар у Віцебску» прызначыла з 11 па 18 ліпеня 2023 года цягнік міжнародных ліній №209/210 Віцебск-Масква-Віцебск. У гэтыя дні ён будзе адпраўляцца з Віцебска ў 07:10 з прыбыццём у Маскву ў 16:59, назад з Масквы цягнік з гасцямі і ўдзельнікамі фестывалю будзе адпраўляцца ў 23:49, і прыбудзе ў Віцебск раніцай наступнага дня ў 08:36.

Продаж праязных дакументаў на цягнік №209/210 Віцебск-Масква-Віцебск ужо адкрыты – пасажырам даступны месцы ў плацкартных вагонах, а таксама ў купэ і СВ.

На час правядзення фестывалю «Славянскі базар у Віцебску» прызначаны яшчэ адзін дадатковы цягнік №644/643 Мінск-Віцебск-Мінск. Яго расклад руху складзены з улікам праграмы фестывалю – каб пасажыры маглі прыехаць у Віцебск да вячэрняй канцэртнай праграмы, а пасля яе заканчэння адправіцца назад дадому прамым начным цягніком. З Мінска з 12 па 17 ліпеня 2023 года цягнік будзе адпраўляцца ў 12:30 з прыбыццём у Віцебск у 16:05, а назад з Віцебска ён будзе адпраўляцца з 13 па 18 ліпеня ў 01:28 і прыбываць у Мінск у 5:41.

Продаж білетаў на цягнік №644/643 Мінск-Віцебск-Мінск адкрыецца 29 мая 2023 года (за 45 сутак да адпраўлення першага саставу) – пасажырам будуць даступны месцы ў плацкартных і купэйных вагонах.

Набыць праязныя дакументы можна на афіцыйным інтэрнэт-сайце Беларускай чыгункі ў раздзеле «Паслугі пасажырам» (pass.rw.by), з дапамогай мабільнага дадатку «БЧ. Мой поезд», а таксама ў чыгуначных касах.

Інфармацыя падрыхтавана прэс-цэнтрам БЧ